ایشین چیمپئن شپ کے فاتح کھلاڑیوں نے ڈپٹی کمشنر رانچی سے ملاقات کی

جدید بھارت نیوز سروس
رانچی،21؍اپریل: ایشین چیمپئن شپ میں شاندار کارکردگی کا مظاہرہ کرنے والے جھارکھنڈ کے کھلاڑیوں نے ضلع مجسٹریٹ کم ڈپٹی کمشنر، رانچی منجوناتھ بھجنتر ی سے خیر سگالی ملاقات کی۔جھارکھنڈ اولمپک ایسوسی ایشن کے جنرل سکریٹری ڈاکٹر مدھوکانت پاٹھک کی قیادت میں دنیش کمار، ریشما کماری اور بسنتی کماری نے ضلع مجسٹریٹ کم ڈپٹی کمشنر منجوناتھ بھجنتری سے ملاقات کی۔ضلع مجسٹریٹ کم ڈپٹی کمشنر منجوناتھ بھجنتر ی نے تمام کھلاڑیوں کو ان کی کامیابیوں پر مبارکباد دیتے ہوئے ان کی حوصلہ افزائی کی۔ انہوں نے کہا کہ جھارکھنڈ کے کھلاڑی مسلسل قومی اور بین الاقوامی سطح پر اپنی شناخت بنا رہے ہیں، جو ریاست کے لیے فخر کی بات ہے۔ انہوں نے کھلاڑیوں کو مستقبل میں مزید بہتر کارکردگی کے لیے ترغیب دی اور ہر ممکن انتظامی تعاون کا یقین دلایا۔06 اپریل 2026 سے 11 اپریل 2026 تک دہلی میں منعقدہ ایشین چیمپئن شپ میں ان کھلاڑیوں نے شاندار کارکردگی کا مظاہرہ کرتے ہوئے کئی تمغے اپنے نام کیے۔ اس باوقار مقابلے میں دنیش کمار نے دو طلائی تمغے جیت کر ریاست کا نام روشن کیا۔ وہیں، ریشما کماری نے ایک چاندی اور ایک کانسی کا تمغہ حاصل کیا۔ جبکہ بسنتی کماری نے خواتین کے انڈر-25 زمرے میں طلائی تمغہ جیت کر بہترین کارکردگی کا مظاہرہ کیا۔