صنعتوں کے فروغ کے لیے ڈی سی نے کی جائزہ میٹنگ

سرکاری اسکیموں کے نفاذ پر زور؛بینکوں میں زیر التواء درخواستوں کو جلد نمٹانے کی ہدایت

جدید بھارت نیوز سروس
چترا، 22 جون :۔ ضلعی ہیڈکوارٹر کے آڈیٹوریم میں ڈپٹی کمشنر روی آنند کی صدارت میں محکمہ صنعت کی ایک اہم جائزہ میٹنگ منعقد ہوئی۔ اس میٹنگ میں ضلع صنعت مرکز (DIC) کے تحت چلنے والی مختلف اسکیموں، انٹرپرینیورشپ ڈیولپمنٹ پروگراموں اور صنعتوں کے فروغ سے متعلق سرگرمیوں کی پیش رفت کا تفصیلی جائزہ لیا گیا۔میٹنگ کے دوران وزیراعظم روزگار سرجن پروگرام (PMEGP)، وزیراعظم مائیکرو فوڈ انڈسٹری اپ گریڈیشن اسکیم (PMFME)، وزیراعظم وشوکرما یوجنا اور ‘ایز آف ڈوئنگ بزنس‘ (EODB) سے متعلق کاموں پر گہرائی سے بات چیت کی گئی۔ ڈی سی نے متعلقہ افسران کو ہدایت دی کہ وہ مقررہ اہداف کے حصول کے لیے فعال کردار ادا کریں اور مستحقین کو وقت پر اسکیموں کا فائدہ پہنچائیں۔
بینکنگ شعبے میں زیر التواء معاملات پر تشویش
میٹنگ میں بتایا گیا کہ مالی سال 27-2026 کے لیے وزیراعظم مائیکرو فوڈ انڈسٹری اپ گریڈیشن اسکیم کے تحت ضلع کو 46 مستحقین کا ہدف ملا ہے، تاہم مختلف بینک برانچوں میں بڑی تعداد میں درخواستیں زیر التواء ہیں۔ اس پر ڈی سی نے افسران کو ہدایت دی کہ وہ زیر التواء معاملات کو جلد نمٹانے کے لیے بینکوں کے ساتھ تال میل قائم کریں اور قرض کی منظوری اور تقسیم کے عمل میں تیزی لائیں۔ ساتھ ہی یہ ہدایت بھی دی گئی کہ آئندہ میٹنگ میں بینکنگ اداروں کے نمائندوں کو بھی شامل کیا جائے۔
مقامی دستکاری اور روایتی ہنر پر توجہ
ڈی سی نے وزیر اعلیٰ مائیکرو اور کاٹیج انڈسٹری ڈیولپمنٹ بورڈ اور مٹی کلا بورڈ کی اسکیموں کا بھی جائزہ لیا ۔ انہوں نے بلاک سطح کے افسران کو ہدایت دی کہ وہ مقامی دستکاروں اور روایتی کاریگروں کا سروے کریں اور انہیں تربیت، مارکیٹنگ اور سرکاری اسکیموں سے جوڑیں۔ انہوں نے بھدرکالی اور کولیشور جیسے مذہبی و سیاحتی مقامات پر مقامی دستکاری کی مصنوعات کی مارکیٹنگ کے امکانات تلاش کرنے پر زور دیا تاکہ کاریگروں کی آمدنی میں اضافہ ہو اور ضلع کی ایک منفرد شناخت قائم ہو سکے۔میٹنگ میں جنرل منیجر ضلع صنعت مرکز شنبھو شرن بیٹھا، ای او ڈی بی منیجر شبھاشیش کمار، ضلع انٹرپرینیورشپ کوآرڈینیٹر ہیمنت کیسری اور دیگر متعلقہ افسران موجود تھے۔