جھارکھنڈ اسپورٹس سوسائٹی کا پہلا سالانہ عام اجلاس کا انعقاد

سابق کھلاڑیوں کی فلاح و بہبود اور ریاست میں کھیلوں کے فروغ کے لیے جامع حکمت عملی تیار

جدید بھارت نیوز سروس
رانچی، 21 جون :۔مرانگ گومکے جے پال سنگھ منڈا اسٹو ٹرف ہاکی اسٹیڈیم، مورہابادی میں جھارکھنڈ اسپورٹس سوسائٹی (JSS) کی پہلی سالانہ عام اجلاس منعقد ہوئی۔ اس اہم اجلاس کی صدارت آئی پی ایس افسر اور سینئر اسپورٹس ایڈمنسٹریٹر ڈاکٹر سروجنی لاکڑا نے کی۔ اجلاس میں ریاست بھر سے 55 سے زائد سابق قومی اور بین الاقوامی کھلاڑیوں، کوچز اور کھیلوں کے ماہرین نے شرکت کی۔میٹنگ کا بنیادی مقصد سابق کھلاڑیوں کی شناخت اور وقار کو برقرار رکھنے کے ساتھ ساتھ جھارکھنڈ میں کھیلوں کی مجموعی ترقی کے لیے ایک ٹھوس حکمت عملی تشکیل دینا تھا۔ اس دوران نوجوان کھلاڑیوں کو درپیش چیلنجز اور مسائل پر تفصیلی تبادلہ خیال کیا گیا۔ سوسائٹی کے کامیاب آپریشن کے لیے مختلف کمیٹیوں کی تشکیل، کھیل کے پروگراموں کا انعقاد اور کھلاڑیوں کو بہتر مواقع فراہم کرنے پر بھی غور کیا گیا۔اجلاس میں شرکاء نے اس بات پر زور دیا کہ تجربہ کار کھلاڑیوں اور کوچز کے تجربات کا فائدہ نئی نسل تک پہنچانا وقت کی اہم ضرورت ہے۔ سوسائٹی کا مقصد ریاست میں کھیلوں کے کلچر کو مضبوط کرنا، صلاحیتوں کی حوصلہ افزائی کرنا اور کھلاڑیوں اور کھیلوں کی تنظیموں کے درمیان بہتر تال میل قائم کرنا ہوگا۔ یہ تنظیم باصلاحیت کھلاڑیوں کی شناخت، تربیت اور رہنمائی پر خصوصی توجہ مرکوز کرے گی۔اس اہم اجلاس میں دھیان چند ایوارڈ یافتہ سم رائے ٹیٹے، سابق ہاکی کھلاڑی ساوتری پورتی، ٹیلیسفور ایکا، کرونا پورتی، وجے نیلمنی کھلکھو، زیویئر گِد، نکولس کھلکھو، بریندر لکڑا، راجیش کمار سنگھ، سنیل کچھپ، الیکسیئس لکڑا، کمل ہورو، راجے کماری کجور، اروند کمار، سنتوش کمار، اماسی بارلااور شیو کمار رمن سمیت کئی نامور کھلاڑی اور ماہرین موجود تھے۔ آخر میں تمام ارکان نے جھارکھنڈ میں کھیلوں کی ترقی کے لیے متحد ہو کر کام کرنے کا عزم کیا۔ سوسائٹی کی جنرل سیکرٹری سم رائے ٹیٹے نے بتایا کہ تنظیم مستقبل میں کھلاڑیوں کے مفاد میں مختلف پروگرام منعقد کرے گی۔