ڈی جی فائر سروسز ایم ایس بھاٹیا نے وزیراعلیٰ اور گورنر سے کی ملاقات

’فائر سروس ہفتہ‘ کے موقع پر بیج لگایا؛ آگ سے بچاؤ کے لیے بیداری مہم پر تبادلہ خیال

جدید بھارت نیوز سروس
رانچی، 14 اپریل: ہوم گارڈ اور فائر سروسز کے ڈائریکٹر جنرل ایم ایس بھاٹیا نے وزیراعلیٰ ہیمنت سورین اور گورنر سنتوش کمار گنگوار سے فرداً فرداً خیر سگالی ملاقات کی۔ ’فائر سروس ہفتہ‘ (Fire Service Week) کی مناسبت سے انہوں نے وزیراعلیٰ اور گورنر کو خصوصی بیج لگایا۔ اس ملاقات کے دوران فائر سروسز کی اہمیت، آگ سے بچاؤ کی تدابیر اور عوامی بیداری مہم کو مزید مؤثر بنانے کے حوالے سے تبادلہ خیال کیا گیا۔ وزیراعلی ہیمنت سورین نے فائر بریگیڈ کے اہلکاروں کی خدمات کی ستائش کرتے ہوئے کہا کہ کسی بھی آفت کے وقت ان کی مستعدی اور خدمت کا جذبہ قابلِ تحسین ہے۔ انہوں نے عوام سے بھی اپیل کی کہ وہ آتشزدگی کے واقعات سے بچنے کے لیے احتیاطی تدابیر اختیار کریں اور بیدار رہیں۔ دوسری جانب گورنر نے فائر سروسز کی اہمیت پر روشنی ڈالتے ہوئے کہا کہ ہنگامی حالات میں یہ اہلکار اپنی جان خطرے میں ڈال کر جانی و مالی تحفظ کو یقینی بناتے ہیں۔ انہوں نے ’فائر سروس ہفتہ‘ کے ذریعے شہریوں میں آگ سے بچاؤ کے اصولوں کی آگاہی پھیلانے کی کوششوں کو سراہا اور سبھی سے حفاظتی ضوابط پر عمل کرنے کی اپیل کی۔