لاکھوں عازمین کا خیموں کے شہر میں ڈیرہ؛ میدانِ عرفات روانگی آج
مناسکِ حج کا پہلا مرحلہ ’یوم الترویہ‘ مکمل، غزہ کے عازمین مسلسل تیسرے سال بھی حج سے محروم
مکہ مکرمہ، 25 مئی:۔ (ایجنسی) حج 1447 ہجری کے مناسک کا باقاعدہ آغاز ہو چکا ہے، جس کے ساتھ ہی سال میں چند دنوں کے لیے آباد ہونے والی دنیا کی سب سے بڑی عارضی خیمہ بستی ’منیٰ‘ لاکھوں عازمین کے جذبہ ایمانی اور ’لبیک‘ کی روح پرور صداؤں سے گونج اٹھی ہے۔ دنیا بھر سے آئے ہوئے لاکھوں عازمینِ حج نے 8 ذوالحجہ کا پورا دن ’یوم الترویہ‘ کے طور پر وادیِ منیٰ میں ذکر و اذکار اور عبادت الٰہی میں گزارا۔ مکہ مکرمہ میں اس وقت موسم انتہائی گرم ہے اور درجہ حرارت 40 ڈگری سیلسیس سے تجاوز کر چکا ہے، لیکن تپتی دھوپ اور شدید گرمی کے باوجود عازمینِ حج کے جوش و جذبے اور خشوع و خضوع میں کوئی کمی دیکھنے کو نہیں مل رہی ہے۔سفید خیموں کا جدید شہر اور ٹیکنالوجی کا مربوط نظام
ہر برس کی طرح اس بار بھی منیٰ نے ایک جدید عارضی شہر کی شکل اختیار کر لی ہے، جہاں لاکھوں عازمینِ حج کے آرام و آسائش کے لیے سعودی حکومت کی جانب سے غیر معمولی انتظامات کیے گئے ہیں۔ سفید خیموں پر مشتمل اس وسیع بستی میں چوبیس گھنٹے بجلی، ائیر کنڈیشننگ، فول پروف سکیورٹی، طبی سہولیات اور آمدورفت کے منظم نیٹ ورک مسلسل کام کر رہے ہیں۔ عازمینِ حج کی نقل و حرکت کو قابو میں رکھنے کے لیے جدید ترین ڈیجیٹل ٹیکنالوجی اور مربوط مانیٹرنگ سسٹم سے مدد لی جا رہی ہے۔ مکہ مکرمہ سے عازمینِ حج کو منیٰ منتقل کرنے کے لیے مشاعرِ مقدسہ الیکٹرک ٹرین اور ہزاروں ہائی ٹیک بسوں کا استعمال کیا گیا۔ مکہ مکرمہ کی شدید گرمی کے احساس کو کم کرنے کے لیے منیٰ کی تمام اہم شاہراہوں پر پانی کی باریک پھوار برسانے والے ہزاروں پولز اور سمارٹ پنکھے فعال کر دیے گئے ہیں۔
ہندوستانی عازمین کی تعداد اور قونصل جنرل کے اقدامات
ہندوستان سے تعلق رکھنے والے عازمینِ حج کے حوالے سے مکہ مکرمہ میں موجود انڈین حج ہاؤس کے ایک اہلکار نے بتایا کہ امسال حج کمیٹی آف انڈیا (HCI) کے ذریعے کل 1,22,464 عازمین مکہ مکرمہ پہنچ چکے ہیں، جبکہ 52,507 زائرین نے پرائیویٹ ٹور آپریٹرز کے ذریعے اس مقدس سفر کا آغاز کیا ہے۔ جدہ میں متعین ہندوستانی قونصل جنرل فہد احمد خان سوری نے بتایا کہ حج کمیٹی آف انڈیا سروس پرووائیڈرز (معلمین یا مطوفین) کی مدد اور عازمین کی سہولت کے لیے مکہ مکرمہ اور مشاعرِ مقدسہ میں 34 ہاسپیٹلیٹی (مہمان نوازی) مراکز چلا رہی ہے، تاکہ ہندوستانی زائرین کو مناسک کی ادائیگی کے دوران کسی قسم کی پریشانی کا سامنا نہ کرنا پڑے۔
غزہ کے عازمین مسلسل تیسرے سال بھی حج سے محروم؛ وزارت کا بیان
دوسری جانب، غزہ کی پٹی میں جاری انسانی بحران اور جنگی حالات کا سایہ اس سال کے حج پر بھی صاف دکھائی دے رہا ہے۔ مسلسل تیسرے سال بھی غزہ کے ہزاروں فلسطینی سرحدوں پر عائد پابندیوں اور مصر کے ساتھ رفح کراسنگ کی بندش کے باعث حج کے لیے روانہ ہونے سے محروم رہے ہیں۔ غزہ کی وزارتِ اوقاف کے مطابق، باضابطہ حج لاٹری کے ذریعے منتخب ہونے والے 2,402 فلسطینی حج کی منظوری حاصل کرنے کے باوجود غزہ کے اندر ہی پھنسے ہوئے ہیں۔ وزارت نے یہ بھی رپورٹ کیا ہے کہ منتخب عازمین میں سے 71 زائرین جنگی حالات اور مناسب طبی علاج معالجہ نہ ملنے کے باعث اس مقدس سفر پر روانہ ہونے سے پہلے ہی وفات پا گئے۔
