سُجل گرام سمواد میں طویل مدتی پانی کے تحفظ پر زور

نئی دہلی، 25 جون (یو این آئی) جل جیون مشن کے تحت منعقدہ ‘سُجل گرام سمواد کے آٹھویں ایڈیشن میں پانی کے ماہرین نے پانی کے تحفظ کے مختلف مسائل پر تبادلہ خیال کرتے ہوئے کہا کہ دیہی علاقوں میں طویل مدتی پانی کی حفاظت کو یقینی بنانے کے لیے پانی کے ذرائع کا تحفظ، پینے کے پانی کی اسکیموں کی باقاعدہ دیکھ بھال اور پانی کے معیار کی مسلسل نگرانی ضروری ہے۔وزارتِ جل شکتی کے پینے کے پانی اور صفائی ستھرائی کے محکمے کی طرف سے منعقدہ اس کثیر لسانی سمواد (مکالمے) میں ملک بھر کی گرام پنچایتوں، گرام جل اور صفائی ستھرائی کی کمیٹیوں، سیلف ہیلپ گروپس ، آنگن واڑی کارکنوں، طلبہ اور مختلف ریاستوں کے افسران نے شرکت کی۔ پروگرام کی صدارت قومی جل جیون مشن کے ایڈیشنل سکریٹری اور مشن ڈائریکٹر کمل کشور سوین نے کی۔جل جیون مشن کے تحت تیار کیے جا رہے پینے کے پانی کے نظام کے حوالے سے سمواد کے دوران مقررین نے کہا کہ اس اسکیم کو اگلے 25 سے 30 سال کی ضروریات کو مدنظر رکھ کر تیار کیا جا رہا ہے۔ ان کا کہنا تھا کہ پانی کے ذرائع کے استحکام، پانی کے ضیاع کو روکنے، وقت پر آپریشن اور دیکھ بھال اور مقامی سطح پر مرمت اور نگرانی کی صلاحیت پیدا کرنے پر خصوصی توجہ دینے کی ضرورت ہے۔مانسون کے دوران پانی کے معیار کی جانچ کو مزید مؤثر بنانے اور پانی سے پیدا ہونے والی بیماریوں کی روک تھام کے لیے کمیونٹی کی فعال شرکت پر زور دیتے ہوئے انہوں نے کہا کہ تربیت یافتہ خواتین، رضاکاروں اور گرام سطح کے اداروں کی شمولیت محفوظ پینے کا پانی فراہم کرنے میں اہم کردار ادا کر سکتی ہے۔ پروگرام میں مختلف ریاستوں کی گرام پنچایتوں کے نمائندوں نے جل جیون مشن کے نفاذ، پانی کے معیار کی نگرانی اور کمیونٹی کی شرکت سے متعلق اپنے تجربات بھی شیئر کیے۔