پولنگ اہلکار سخت حفاظتی انتظامات کے تحت ای وی ایم مشینوں کے ساتھ واپس آرہے ہیں: اے وی ہومکر
جدید بھارت نیوز سروس
رانچی، 20 نومبر:۔ چیف الیکٹورل افسر مسٹر کے روی کمار نے کہا ہے کہ سب کے تعاون سے ووٹنگ کا دوسرا مرحلہ پرامن طریقے سے مکمل ہوا ہے۔ شام 5 بجے تک تقریباً 67.59 فیصد ووٹنگ ہوئی۔ ووٹر ٹرن آؤٹ کی رپورٹ رات 11 بجے تک متوقع ہے، جبکہ پولنگ کے اختتام کی مکمل رپورٹ جمعرات کی دوپہر تک آ جائے گی۔ جمعرات کی دوپہر تک جانچ کے بعد اسٹرانگ روم میں ای وی ایم مشینوں کو سیل کر دیا جائے گا۔ انہوں نے کہا کہ بدھ کو ماڈل کوڈ آف کنڈکٹ کی خلاف ورزی پر پانچ مقدمات درج کیے گئے ہیں اور ایک کے خلاف مقدمہ درج کرنے کی کارروائی کی جا رہی ہے۔ وہ بدھ کو نرواچن سدن، دھروا میں ریاستی پولیس کے نوڈل آفیسر مسٹراے وی ہومکر کے ساتھ مشترکہ پریس کانفرنس کر رہے تھے۔ ریاستی پولیس کے نوڈل آفیسر شری اے وی ہومکر نے کہا کہ ووٹنگ ختم ہونے کے بعد پولنگ اہلکار سخت حفاظتی انتظامات اور نگرانی کے تحت ای وی ایم مشینوں کے ساتھ اپنے اپنے مقامات پر واپس جا رہے ہیں۔ انہوں نے کہا کہ انتخابات کے دوسرے مرحلے میں 891 بوتھ نکسلیوں کے تئیں حساس تھے۔ جبکہ 6828 بوتھ نازک زمرے میں تھے۔ اس سلسلے میں پیرا ملٹری فورس کی 585 کمپنیاں تعینات کی گئیں۔ ان کے ساتھ ریاستی مسلح افواج کی 60 کمپنیاں بھی تھیں۔ اس کے علاوہ ہوم گارڈز اور ریاستی پولیس کے 26000 اضافی اہلکاروں کو تعینات کیا گیا تھا۔ کوبرا بٹالین اور جھارکھنڈ جیگوار کے سپاہی نکسلیوں سے منسلک علاقوں میں مسلسل سرگرم تھے۔ انہوں نے بتایا کہ بنگال اور بہار کی سرحد کو ووٹنگ کے لیے سیل کر دیا گیا ہے۔ وہاں 114 چوکیاں بنائی گئیں۔ بہار اور بنگال نے بھی تعاون کیا اور اپنے سرحدی علاقوں میں 124 چوکیاں بنائیں۔ اس دوران 115 غیر قانونی آتشیں اسلحہ اور 1800 کارتوس ضبط کیے گئے ہیں۔ ان کے ساتھ 34 ہزار افراد کے خلاف قانونی کارروائی کی گئی ہے۔ پورے انتخابات کے دوران، ریاستی پولیس نے اکیلے غیر قانونی مواد اور 163 کروڑ روپے کی نقدی ضبط کی۔ چیف الیکٹورل آفیسر نے کہا کہ انتخابی ضابطہ اخلاق کے نفاذ کے بعد سے اب تک مجموعی طور پر 207.36 کروڑ روپے کا غیر قانونی مواد اور نقدی ضبط کی گئی ہے۔
