جاری کردہ مسودہ فہرست سے صرف وزیر اعلیٰ ممتا کے اسمبلی حلقے سے ہی 44,770 نام باہر
جدید بھارت نیوز سروس
کولکاتا، 16 دسمبر: الیکشن کمیشن نے ایس آئی آر (خصوصی گہری نظر ثانی) کے تحت شائع ہونے والی ووٹروں کی مسودہ فہرست (Draft Voter List) میں بنگال میں 58.20 لاکھ ووٹروں کے ناموں پر قینچی چلا دی ہے۔ یعنی مذکورہ بالا نام حذف کر دیے گئے ہیں۔ وہیں اگر ریاستی وزیر اعلیٰ ممتا بنرجی کے اسمبلی حلقہ بھوانی پور کے اعداد و شمار پیش کیے جائیں، تو یہاں کے 44,770 ووٹروں کے نام کاٹ دیے گئے ہیں۔اس پر حکمراں ترنمول اور اپوزیشن کی طرف سے مختلف رد عمل آنا شروع ہو گیا ہے۔ الیکشن کمیشن نے آج مغربی بنگال کی خصوصی گہری نظر ثانی (SIR) کی مسودہ ووٹر لسٹ جاری کر دی ہے۔بنگال میں 58 لاکھ 20 ہزار 898 ووٹروں کے ناموں کو ہٹانے کے لیے نشان زد کیا گیا ہے۔ ان میں 24 لاکھ 16 ہزار 852 نام مرحوم ووٹروں کے ہیں۔ 19 لاکھ 88 ہزار 76 ووٹر ایسے ہیں جو مستقل طور پر دوسری جگہ منتقل ہو گئے ہیں۔ اس کے علاوہ 12 لاکھ 20 ہزار 38 ووٹر لاپتہ، 1 لاکھ 38 ہزار 328 ڈوپلیکیٹ یا جعلی، اور 57 ہزار 604 نام دیگر وجوہات کی بنا پر ہٹانے کی تجویز میں ہیں۔جن کے نام ہٹائے گئے ہیں، وہ فارم-6 بھر کر دستاویزات کے ساتھ دعویٰ کر سکتے ہیں۔ اس کے ساتھ ہی گھر گھر جا کر معلومات جمع کرنے کا کام مکمل ہو گیا ہے۔ اب آگے دعویٰ، اعتراض اور سماعت کا عمل شروع ہوگا۔ ایس آئی آر کا دوسرا مرحلہ فروری 2026 تک چلے گا اور حتمی ووٹر لسٹ 14 فروری 2026 کو جاری ہوگی۔ اس کے ساتھ ہی ملک کی راجستھان سمیت 4 ریاستوں اور مرکز کے زیر انتظام علاقوں میں بھی آج ووٹر لسٹ کا مسودہ شائع کیا جائے گا۔الیکشن کمیشن کے اعداد و شمار کے مطابق، ریاست کے 294اسمبلی حلقوں میں سب سے زیادہ نام کولکاتا کے چورنگی اور کولکاتا پورٹ جیسے علاقوں میں حذف ہوئے ہیں۔ چورنگی اسمبلی حلقے میں 74,553 نام ہٹائے گئے۔ یہاں سے ایم ایل اے ترنمول کانگریس کی نَینا بندیوپادھیائے ہیں۔ کولکاتا پورٹ سے کل 63,730ام ہٹائے گئے، جس کی نمائندگی سینئر وزیر فرہاد حکیم کرتے ہیں۔ وہیں سابق وزیر کھیل اروپ بسواس کے ٹولی گنج میں 35,309ام ہٹائے گئے۔ سب سے کم نام بانکوڑا ضلع کے کوتُل پور سے ہٹائے گئے، جہاں 5,678ام ہٹائے گئے۔الیکشن کمیشن نے بتایا کہ ووٹر کی موت، دوسری جگہ منتقلی اور ڈوپلیکیٹ اندراج کی وجہ سے ان کے نام لسٹ سے ہٹائے گئے ہیں۔دریں اثنا، شائع شدہ مسودہ ووٹر لسٹ میں وزیر اعلیٰ ممتا بنرجی کی بھوانی پور اسمبلی سیٹ کے اہم اعداد و شمار سامنے آئے ہیں۔ جنوبی کولکاتا کی اس سیٹ پر اکتوبر 2025 تک کی پچھلی ووٹر لسٹ کے مقابلے میں کل 44 ہزار 770 ووٹروں کے نام مسودہ فہرست سے باہر کر دیے گئے ہیں۔مسودہ فہرست کے مطابق، بوتھ نمبر 260 سے 127 ووٹروں کے نام ہٹائے گئے ہیں۔ اسی بوتھ پر وزیر اعلیٰ ممتا بنرجی اور ترنمول کانگریس کے جنرل سکریٹری ابھیشیک بنرجی ووٹ ڈالتے ہیں۔ ان 127 ووٹروں میں 13 مرحوم پائے گئے ہیں، جبکہ باقی ووٹروں کو منتقل شدہ، پتہ معلوم نہ ہونے والا، دوہرا نام یا دیگر وجوہات کی بنا پر فہرست سے خارج کیا گیا ہے۔قابل ذکر ہے کہ 2021 کے اسمبلی انتخابات میں ممتا بنرجی کو نندی گرام سیٹ پر بی جے پی امیدوار شوبھندو ادھیکاری کے ہاتھوں تقریباً 2,000 ووٹوں سے شکست کا سامنا کرنا پڑا تھا۔ اس کے بعد ممتا بنرجی نے بھوانی پور سے ہوئے ضمنی انتخابات میں جیت حاصل کی اور لگاتار تیسری بار وزیر اعلیٰ کی کرسی برقرار رکھی۔ بھوانی پور اسمبلی سیٹ کولکاتا جنوبی لوک سبھا حلقے کے تحت آنے والی سات اسمبلی سیٹوں میں سے ایک ہے۔
