میونسپلٹی کے پاس کافی انفراسٹرکچر نہیں ہے: میئر
کولکاتہ:کولکاتہ میں معمولی بارش کے بعد بھی شہر کے مختلف علاقوں میں پانی جمع ہونے کی صورتحال پیدا ہو گئی ہے۔ کچھ مقامات پر پانی گھٹنوں تک اور کچھ میں کمر تک جمع ہو رہا ہے۔ میونسپل ورکرز مین ہولز اور گڑھوں کی صفائی کے دوران پلاسٹک اور پولی تھین کے تھیلوں کے ڈھیر دیکھ کر حیرت زدہ ہیں، جو زیر زمین نکاسی آب کے نظام کو بند کر رہے ہیں۔کولکاتہ کے میئر فرہاد حکیم نے واضح کیا کہ شہر میں سنگل یوز پلاسٹک کے استعمال کو روکنے کے لیے پولیس کی سخت نگرانی اور محکمہ ماحولیات کے قواعد و ضوابط میں تبدیلی کی ضرورت ہے۔ انہوں نے کہا کہ اگر ضروری ہوا تو ان فیکٹریوں کے خلاف بھی کارروائی کی جائے گی جہاں پلاسٹک یا پولی تھین کے بیگز تیار کیے جا رہے ہیں۔ میئر نے اس سلسلے میں وزیر ماحولیات کو خط بھیجنے اور پولیس کمشنر کو دوبارہ خطوط لکھنے کا اعلان کیا تاکہ بازاروں میں پلاسٹک کے استعمال کو روکا جا سکے۔ وارڈ نمبر 28 کے کونسلر آیان چکرورتی نے کولکتہ میونسپلٹی کے ماہانہ اجلاس میں پلاسٹک کے مسائل اٹھائے۔ اس پر میئر نے کہا کہ بلدیہ پہلے بھی بازاروں میں پلاسٹک کے خلاف مہم چلا چکی ہے اور بعض اوقات چھاپے بھی کیے گئے، لیکن میونسپلٹی کے پاس اس کے ضبط کرنے یا قانونی کارروائی کرنے کے لیے کافی انفراسٹرکچر یا افرادی قوت موجود نہیں ہے۔میئر نے مزید بتایا کہ بیچنے والے کو 500 روپے اور خریدار کو 50 روپے جرمانہ کیا جائے گا۔ ان کا کہنا تھاکولکاتہ میں پانی بھرنے کی سب سے بڑی وجہ پلاسٹک ہے۔ یہ مین ہول کے منہ کو بند کر دیتا ہے۔ ہم کافی عرصے سے صفائی کر رہے ہیں، لیکن اب محکمہ ماحولیات کو قواعد و ضوابط میں تبدیلی کی تجویز بھیجی جائے گی۔”میونسپل حکام نے وضاحت کی کہ میونسپلٹی کے پاس سنگل یوز پلاسٹک کے معاملے میں قانونی حقوق، بنیادی ڈھانچہ یا افرادی قوت نہیں ہے، اس لیے ریاستی تعاون ضروری ہے۔ میئر فرہاد حکیم نے زور دیا کہ شہر کے نکاسی آب کے نظام کو مؤثر بنانے کے لیے پولیس نگرانی اور قوانین میں تبدیلی ناگزیر ہے۔
