چیف الیکشن کمشنر گیانیش کمار کی سخت ہدایت
جدید بھارت نیوز سروس
کولکاتہ: گیانیش کمار نے جمعہ کو ضلع مجسٹریٹس، الیکٹورل رجسٹریشن آفیسرز اور متعلقہ افسران کو ہدایت دی کہ ایس آئی آر ریکارڈ اگلے پانچ سال تک محفوظ رکھا جائے۔ کمیشن نے واضح کیا کہ اگر جان بوجھ کر یا لاپرواہی سے کوئی غلطی ہوئی تو ضلع مجسٹریٹ اور دیگر اہلکاروں کو کسی قسم کی رعایت نہیں دی جائے گی اور تعزیری کارروائی ہوگی۔ اس ہدایت کے بعد ترنمول کانگریس نے الزام لگایا کہ کمیشن زمینداروں کا راج چلا رہا ہے اور افسران پر غیر ضروری دباؤ ڈالا جا رہا ہے جو محدود وقت میں ایس آئی آر کے کام میں مدد کر رہے ہیں۔ذرائع کے مطابق چیف الیکشن کمشنر نے میٹنگ میں کہا کہ ایس آئی آر کے فیصلے کمیشن کے ڈیٹا بیس میں محفوظ ہوں گے اور مستقبل میں کسی بھی غلطی کی صورت میں متعلقہ افسر کے خلاف کارروائی کی جائے گی۔ کمیشن نے ڈی ایمز کو ہدایت دی کہ وہ تصدیق کریں کہ ای سی آئی اور سپریم کورٹ سے منظور شدہ دستاویزات ہی ای آر اوز اور اے ای آر اوز کے ذریعے زیر غور آئیں، اور 16 فروری تک تمام دستاویزات کی تصدیق کی جائے۔میٹنگ میں ڈی ایمز اور دیگر افسران کو واضح طور پر بتایا گیا کہ غیر واضح، خالی صفحات، دھندلی تصاویر یا اپ لوڈ میں تاخیر پر ذاتی طور پر جوابدہ ہوں گے۔ کمیشن نے مزید کہا کہ مبصرین کو الیکٹورل رجسٹریشن آفیسر اور ڈسٹرکٹ الیکشن آفیسرکی بے ضابطگیوں کی رپورٹ کمیشن کے نوٹس میں لانی ہوگی تاکہ ان کے خلاف مناسب کارروائی ہو سکے۔ کوچ بہار، جلپائی گوڑی، مالدہ، جنوبی و شمالی 24 پرگنہ اور مشرقی مدنا پور کے ڈی ایمز کو لاپرواہی پر سرزنش کی گئی جبکہ مشرقی بردوان کے ڈی ایم کو سیاسی بیانات نہ دینے کی ہدایت دی گئی۔یہ پہلا موقع ہے جب نیشنل الیکشن کمیشن نے ایس آئی آر ریکارڈ پانچ سال تک محفوظ رکھنے کا حکم دیا ہے، جس کا مقصد مستقبل میں کسی بھی غلطی کی صورت میں شفاف اور سخت کارروائی کو یقینی بنانا ہے۔
