ووٹر لسٹ سے نام خارج ہونے کے معاملے پر

ترنمول سڑک سے سپریم کورٹ تک لڑے گی: ممتا بنرجی کا دعویٰ

جدید بھارت نیوز سروس
مالدہ: مغربی بنگال اسمبلی انتخابات کی مہم کے دوران وزیر اعلیٰ اور ترنمول کانگریس سربراہ ممتا بنرجی ہفتہ کو مالتی پور کی انتخابی ریلی میں غیر معمولی طور پر جذباتی نظر آئیں۔ پارٹی امیدواروں کے حق میں ووٹ مانگتے ہوئے انہوں نے عوام سے براہِ راست کہا کہ اگر لوگ کسی اور پارٹی کو ووٹ دیں گے تو انہیں ذاتی طور پر دکھ پہنچے گا۔ ممتا بنرجی نے جلسہ عام سے خطاب کرتے ہوئے کہااگر آپ کسی اور کو ووٹ دیں گے تو میرے اور آپ کے تعلقات نہیں رہیں گے۔ میں بہت جذباتی ہوں، جب بہت کچھ دینے کے بعد بھی کوئی بے وفائی کرتا ہے تو تکلیف ہوتی ہے۔ ان کے اس بیان نے ریلی میں موجود لوگوں کی خاص توجہ حاصل کی۔ تاہم ممتا نے ساتھ ہی یہ بھی واضح کیا کہ وہ ترقیاتی کام کبھی نہیں روکیں گی، لیکن اگر عوام کسی اور کو ووٹ دیتے ہیں تو انہیں ذہنی اور جذباتی طور پر صدمہ ضرور ہوگا۔ انہوں نے کہا،میں آپ کی ترقی نہیں روکوں گی، لیکن مجھے دکھ ضرور ہوگا۔مالتی پور کی اس ریلی میں ممتا بنرجی رتوا، مالتی پور اور ہریش چندر پور کے ترنمول امیدواروں کی حمایت میں ووٹ مانگ رہی تھیں۔ اپنی تقریر کے دوران انہوں نے ایک بار پھر اپوزیشن جماعتوں پر سخت حملہ کیا اور خاص طور پر کانگریس، سی پی ایم، بی جے پی اور ایس آئی آر کے مسئلے کو موضوع بنایا۔ ممتا نے سوال اٹھایا کہ اگر یہاں کانگریس ایک سیٹ جیت بھی جائے تو کیا وہ حکومت بنا لے گی؟ انہوں نے الزام لگایا کہ سی پی ایم اور بی جے پی کے درمیان اندرونی سمجھوتہ ہے، جبکہ کچھ دوسری جماعتیں بھی بی جے پی کے سہارے سیاست کر رہی ہیں۔ بغیر کسی کا نام لیے انہوں نے میم کو بھی نشانہ بنایا اور کہا کہ کچھ لوگ بی جے پی کے پیسوں پر اڑ رہے ہیں۔ ممتا بنرجی نے یہ بھی کہا کہ اگر ترنمول کانگریس نہ ہو تو عام لوگوں کے حق میں سڑک سے سپریم کورٹ تک لڑنے والا کوئی نہیں ہوگا۔
اپنی تقریر میں انہوں نے ایس آئی آر اور ووٹر لسٹ سے نام خارج ہونے کے معاملے کو بھی زور دے کر اٹھایا۔ انہوں نے دعویٰ کیا کہ لاکھوں لوگوں کے ناموں کے مسئلے پر ان کی پارٹی مسلسل سیاسی اور قانونی لڑائی لڑ رہی ہے۔ انہوں نے متاثرہ ووٹروں سے اپیل کی کہ اگر ان کا نام فہرست سے ہٹا دیا گیا ہے تو وہ ٹرائبونل میں درخواست دیں، کیونکہ ترنمول ان کے ساتھ کھڑی ہے۔ مجموعی طور پر مالتی پور کی یہ ریلی صرف ایک سیاسی جلسہ نہیں رہی بلکہ ممتا بنرجی نے یہاں جذبات، تعلقات اور سیاسی وفاداری کو بھی اپنی تقریر کا اہم حصہ بنا دیا، جس کی وجہ سے ان کا یہ خطاب انتخابی مہم میں خاص طور پر زیر بحث آ گیا۔