ممتا کی خواتین سے بوتھ اور ای وی ایم کی نگرانی کی اپیل
کولکاتا / شانتی پور: ترنمول کانگریس کی سربراہ اور وزیر اعلیٰ ممتا بنرجی نے شانتی پور کی انتخابی ریلی سے بی جے پی پر سنگین الزام لگاتے ہوئے کہا کہ وہ ووٹوں کی گنتی کے دن گڑبڑ، افواہ اور دباؤ کی سیاست کرنے کی تیاری میں ہے۔ ممتا نے دعویٰ کیا کہ بی جے پی صبح سے یہ پروپیگنڈہ پھیلائے گی کہ وہ جیت رہی ہے تاکہ ماحول کو متاثر کیا جا سکے۔ انہوں نے کہا کہ اگر عوام کے مزاج کو دیکھا جائے تو اس بار ترنمول کانگریس پہلے سے زیادہ سیٹیں جیتے گی۔ ممتا نے اس انتخاب کو لوگوں کے مستقبل، بنگال میں رہنے کے حق اور بچوں کے تحفظ سے جوڑتے ہوئے کہا کہ یہ صرف ووٹ کا نہیں بلکہ بقا کا سوال ہے۔ ترنمول سپریمو نے ماؤں اور بہنوں سے اپیل کی کہ وہ ووٹنگ کے دن بوتھوں پر پوری طرح چوکس رہیں اور ای وی ایم و وی وی پی اے ٹی پر نظر رکھیں۔ انہوں نے کہا کہ اگر کسی مشین میں خرابی ہو تو ووٹنگ روک دی جائے اور نئی مشین آنے تک انتظار کیا جائے۔ ممتا نے سخت لہجے میں کہا کہ اگر بدامنی پھیلانے یا ووٹنگ روکنے کی کوشش کی گئی تو عوام کو ڈٹ کر مقابلہ کرنا ہوگا اور ہر حال میں ووٹ ڈالنے جانا ہوگا۔ اس موقع پر انہوں نے بیتھوادھری اسکول گراؤنڈ میں پالاشی پارہ، کالی گنج اور نقاشی پارہ کے ترنمول امیدواروں رقبان الرحمان، علیفہ احمد اور کلول خان کے حق میں مہم چلائی۔ ممتا نے اس سے پہلے پورباستھلی کی میٹنگ میں الزام لگایا تھا کہ ووٹر لسٹ سے نام ہٹانے کے لیے اے آئی کا غلط استعمال کیا جا رہا ہے۔ ریلی کے دوران انہوں نے خواتین کے لیے لکشمی بھنڈر اسکیم کو لے کر بڑا وعدہ بھی کیا اور کہا کہ یہ اسکیم زندگی بھر جاری رہے گی۔ بی جے پی پر طنز کرتے ہوئے ممتا نے کہا، وہ کہتے ہیں ہم آئیں گے تو تین ہزار دیں گے، لیکن اصل میں وہ بلڈوزر دیں گے۔ شانتی پور کی اس ریلی سے ممتا بنرجی نے واضح پیغام دیا کہ ترنمول کارکن ووٹنگ اور گنتی دونوں دن پوری تیاری اور ہوشیاری کے ساتھ میدان میں رہیں۔
