شمالی بنگال میں مذہبی اور ثقافتی مرکز کی تعمیر کا اعلان
جدید بھارت نیوز سروس
کولکاتہ/نیو ٹاؤن: بنگال کی وزیر اعلیٰ ممتا بنرجی نے پیر کو نیو ٹاؤن میں تاریخی موقع پر درگا آنگن کا سنگ بنیاد رکھا اور منصوبے کی تفصیلات عوام کے سامنے پیش کیں۔ وزیر اعلیٰ نے اپوزیشن کے ان دعووں کا جواب دیا کہ وہ 26 ویں اسمبلی انتخابات سے قبل ‘ہندوتوا’ پر زور دے رہی ہیں اور کہا کہ وہ تمام مذاہب اور ثقافتوں کا احترام کرتی ہیں، سب کے تہوار سب کے لیے ہیں، اور یہ منصوبہ خاص طور پر یونیسکو کی پہچان کے طور پر بنگال کے سب سے بڑے تہوار درگا پوجا کو سال بھر زندہ رکھنے کے لیے بنایا جا رہا ہے۔ یہ اعلان شمالی بنگال میں حالیہ قدرتی آفات کے اثرات کے تناظر میں بھی آیا ہے، جہاں گزشتہ اکتوبر میں شدید طوفان اور سیلاب نے تباہی مچائی تھی اور وزیر اعلیٰ نے متاثرین سے ملاقات اور دارجلنگ کے مہاکال مندر میں پوجا کے بعد سلی گوڑی میں مہاکال مندر کی تعمیر کا بھی اعلان کیا تھا۔درگا آنگن منصوبہ نیو ٹاؤن ایکو پارک کے قریب 17.28 ایکڑ اراضی پر تعمیر کیا جا رہا ہے، جس کے ارد گرد 20 فٹ چوڑی سڑک ہوگی۔ روزانہ تقریباً 1 لاکھ عقیدت مند آسکیں گے اور صحن میں ایک ساتھ 1000 عقیدت مند بیٹھ سکیں گے۔ منصوبے میں 108 دیوی دیوتاؤں کی مورتیاں اور 64 شیروں کی مورتیاں رکھی جائیں گی، جبکہ لکشمی اور سرسوتی کے لیے الگ منڈپ، پرساد بنانے کے لیے الگ کمرے، ثقافتی پروگراموں کے لیے مخصوص کمروں کی بھی سہولت ہوگی۔ مندر کے احاطے میں دکانیں بنیں گی اور روزگار کے مواقع فراہم کیے جائیں گے۔یہ مکمل منصوبہ 261.99 کروڑ روپے کی لاگت سے مکمل کیا جائے گا، جس میں ریاست 1700 کروڑ روپے فراہم کر رہی ہے اور نگرانی ہڈکوکرے گی۔ وزیر اعلیٰ نے کہا کہ منصوبے کو دسمبر 2027 تک مکمل کر لیا جائے گا اور ابتدائی طور پر 12.6 ایکڑ زمین تھی، لیکن اسے بڑھا کر تقریباً 18 ایکڑ کر دیا گیا تاکہ درگا آنگن بڑا، وسیع اور عوامی سہولت کے مطابق بنایا جا سکے۔ جگہ کا انتخاب اس لیے کیا گیا کہ ہوائی اڈے اور اہم رابطوں سے لوگ آسانی سے پہنچ سکیں۔ممتا بنرجی نے مزید کہا،درگا آنگن بنے گا تاکہ درگا پوجا کی روح سال بھر زندہ رہے، مذہبی، ثقافتی اور سماجی سرگرمیوں کے مواقع فراہم کرے اور لوگوں کو روزگار بھی دے۔ یہ منصوبہ نہ صرف بنگال بلکہ عالمی سطح پر ہمارے تہوار کی پہچان کو اجاگر کرے گا۔
