الیکشن کمیشن پر بی جے پی کے دباؤ میں کام کرنے کا الزام
کولکاتہ: مغربی بنگال کی وزیر اعلیٰ ممتابنرجی نے اسمبلی انتخابات سے قبل سینئر افسران کے تبادلوں پر سخت ناراضگی ظاہر کرتے ہوئے الیکشن کمیشن آف انڈیاپر سنگین الزامات عائد کیے ہیں۔ انہوں نے کہا کہ یہ تبادلے بھارتیہ جنتا پارٹی کے اشارے پر کیے جا رہے ہیں اور اس کا مقصد انتخابی عمل کو متاثر کرنا ہے۔ترنمول کانگریس کی امیدواروں کی فہرست کے اعلان کے موقع پر میڈیا سے گفتگو کرتے ہوئے ممتا بنرجی نے عید سے عین قبل بڑے پیمانے پر افسران کی تبدیلی پر سوال اٹھایا۔ انہوں نے کہا، عید سے پہلے سینئر افسران کا تبادلہ کیوں کیا جا رہا ہے؟ کیا اس کے پیچھے کوئی سازش ہے؟انہوں نے خدشہ ظاہر کیا کہ اس طرح کے فیصلوں سے ریاست میں کشیدگی پیدا ہو سکتی ہے۔وزیر اعلیٰ نے الزام لگایا کہ تبادلوں کی فہرست دراصل بی جے پی کے دفتر میں تیار کی گئی اور الیکشن کمیشن نے اسے نافذ کیا۔ انہوں نے یہ بھی دعویٰ کیا کہ ریاست کے باہر سے کچھ افسران کو لایا جا رہا ہے تاکہ انتخابی عمل میں بی جے پی کو فائدہ پہنچایا جا سکے۔ممتا بنرجی نے الیکشن کمیشن پر سیاسی دباؤ میں کام کرنے کا الزام لگاتے ہوئے کہا کہ کمیشن کو غیر جانبدار رہنا چاہیے، لیکن وہ بی جے پی کے حق میں کھیل رہا ہے۔ انہوں نے طنزیہ انداز میں کہا کہ “اگر ایسا ہی ہے تو انہیں کھل کر بی جے پی کے لیے مہم چلانی چاہیے۔انہوں نے مزید سنگین الزام لگاتے ہوئے کہا کہ افسران کے تبادلوں کا مقصد یہ بھی ہو سکتا ہے کہ پیسہ اور ہتھیار بغیر رکاوٹ کے منتقل کیے جا سکیں، جو جمہوری عمل کے لیے خطرناک ہے۔وزیر اعلیٰ نے سخت انتباہ دیتے ہوئے کہا کہ اگر انتخابی دوران کسی بھی قسم کا ناخوشگوار واقعہ پیش آیا تو اس کی مکمل ذمہ داری بی جے پی اور الیکشن کمیشن پر عائد ہوگی۔واضح رہے کہ حال ہی میں الیکشن کمیشن نے ریاست کے چیف سکریٹری نندنی چکرورتی، ہوم سکریٹری جگدیش پرساد مینا، ڈی جی پی پیوش پانڈے اور کولکاتہ پولیس کمشنر سپرتیم سرکار سمیت کئی اعلیٰ افسران کو ان کے عہدوں سے ہٹا دیا ہے، جبکہ مزید 19 پولیس افسران کے تبادلے بھی کیے گئے ہیں۔مغربی بنگال کی 294 رکنی اسمبلی کے لیے انتخابات دو مرحلوں میں 23 اور 29 اپریل کو ہوں گے، جبکہ ووٹوں کی گنتی 4 مئی کو کی جائے گی۔ ایسے میں سیاسی ماحول پہلے ہی گرم ہے اور اس طرح کے الزامات نے انتخابی فضا کو مزید کشیدہ بنا دیا ہے۔
