میئرفرحاد حکیم نے لکشمی بھنڈار کو اہمیت دی
جدید بھارت نیوز سروس
کولکاتہ: کولکاتا میونسپل کارپوریشن کے مالی سال 2026-27کے بجٹ میں میئر فرہاد حکیم نے سب سے زیادہ توجہ لکشمی بھنڈار اسکیم پر دی، جس پر اپوزیشن نے سخت تنقید کی۔ بائیں بازو اور بی جے پی کے نمائندے اس بات پر سوال کر رہے ہیں کہ شہری خدمات جیسے نکاسی آب، سڑکوں کی مرمت اور دیگر بنیادی سہولیات کو نظر انداز کرتے ہوئے بجٹ تقریر میں ریاستی حکومت کے منصوبوں کو کیوں ترجیح دی گئی۔میئر فرہاد حکیم نے بجٹ پیش کرتے ہوئے بتایا کہ کولکاتا میونسپل کارپوریشن کا بجٹ خسارہ 111 کروڑ روپے ہے۔ یہ پچھلے مالی سال 2025-26کے خسارے 114-72کروڑ روپے سے تھوڑا کم ہے، حالانکہ نظر ثانی کے بعد وہ خسارہ 122 کروڑ روپے تک پہنچ گیا تھا۔ مالی سال 2026-27میں ممکنہ آمدنی5791.43 کروڑ روپے رکھی گئی ہے جبکہ اخراجات5902.43 کروڑ روپے تھے۔ میئر نے بتایا کہ ووٹ پر مبنی سیاست والے بنگال میں اس مدت کے دوران حکومت نے لکشمی بھنڈار کے لیے مختص رقم بڑھا دی ہے۔
اس کا فائدہ خواتین کو مل رہا ہے، جو پہلے 1000 روپے حاصل کر رہی تھیں، اب 1500 روپے وصول کریں گی۔ کولکاتا میں تقریباً 7 لاکھ 83 ہزار خواتین اس اسکیم سے فائدہ اٹھا رہی ہیں، جن میں 1 لاکھ 30 ہزار نئی خواتین شامل ہیں۔وارڈ نمبر 50 کی بی جے پی کونسلر سجل گھوش اور وارڈ نمبر 92 کی سی پی آئی کونسلر مدھوچند ڈیبرا نے سوال کیا کہ لکشمی بھنڈر کو شہری خدمات پر ترجیح دینے کی کیا وجہ ہے۔ اپوزیشن کا کہنا ہے کہ میئر کی تقریر میں صرف لکشمی بھنڈر کو نمایاں کیا گیا، جس سے بنیادی شہری خدمات پس پشت رہ گئیں۔یہ میئر فرہاد حکیم کی دوسری مدت کا آخری مکمل بجٹ ہے، اسی لیے وہ اپنی تقریر میں اسکیم پر زور دے رہے تھے۔ اس دوران، اپوزیشن بی جے پی نے ریاستی بجٹ پر طنز کرتے ہوئے اسےہمپٹی ڈمپٹی بجٹ قرار دیا، بالکل ویسے ہی جیسے ممتا بنرجی نے پہلے نرملا بجٹ کو مذاق کا نشانہ بنایا تھا۔یہ بجٹ انتخابات سے پہلے مالی پالیسیوں اور عوامی خدمات پر ہونے والے سیاسی تنازعات کا آئینہ دار ہے، جہاں اسکیموں کو زیادہ اہمیت دینا اور خسارہ برقرار رہنا بحث کا محور بن گیا ہے۔
