سماعت کے آغاز کے ساتھ مرکزی فورس تعینات
جدید بھارت نیوز سروس
کولکاتا:ریاست میں ایس آئی آر (خصوصی نظرثانی) کے عمل کو لے کر بڑھتے ہوئے احتجاج کے پیش نظر وزارت داخلہ نے کولکاتہ میں چیف الیکٹورل آفیسر (سی ای او) کے دفتر کی سیکورٹی میں نمایاں اضافہ کر دیا ہے۔ حالیہ دنوں میں بی ایل او رائٹس پروٹیکشن کمیٹی کی جانب سے سی ای او آفس کے باہر مسلسل احتجاج اور کشیدہ صورتحال کے بعد یہ قدم اٹھایا گیا ہے۔ذرائع کے مطابق، سنیچر سے ریاست بھر میں سماعت کا مرحلہ شروع ہوتے ہی اسی دن کولکاتہ میں واقع سی ای او آفس کو مرکزی فورسز کی نگرانی میں دے دیا گیا۔ بتایا جا رہا ہے کہ دفتر کو وائی کیٹیگری کی سیکورٹی فراہم کی گئی ہے، جس کے تحت روزانہ چار سے پانچ اہلکاروں پر مشتمل ایک خصوصی ٹیم سی ای او آفس کے باہر تعینات رہے گی۔صرف دفتر ہی نہیں بلکہ ریاست کے چیف الیکٹورل آفیسر منوج کمار اگروال کی ذاتی سیکورٹی میں بھی اضافہ کیا گیا ہے۔ اطلاع کے مطابق انہیں وائی پلس کیٹیگری کی سیکورٹی فراہم کی گئی ہے، اور ان کی حفاظت کی ذمہ داری بھی مرکزی فورسز کے سپرد کر دی گئی ہے۔ مزید یہ کہ دیگر متعلقہ افسران کو بھی اضافی سیکورٹی دی جا سکتی ہے۔قابل ذکر ہے کہ ریاست میں ایس آئی آر کے عمل کے اعلان کے بعد بی ایل اوز (بوتھ لیول آفیسرز) نے کام کے اضافی بوجھ، دباؤ اور دیگر مسائل کے خلاف احتجاج شروع کر دیا تھا۔ بی ایل او رائٹس پروٹیکشن کمیٹی کے بینر تلے مظاہرین نے کولکاتہ میں سی ای او آفس کے باہر دھرنا دیا، جس سے ماحول خاصا کشیدہ ہو گیا۔صورتحال اس وقت مزید بگڑ گئی جب ڈرافٹ ووٹر لسٹ کی اشاعت کے دن مظاہرین نے پولیس کی رکاوٹیں توڑ کر سی ای او آفس میں داخل ہونے کی کوشش کی۔ اس دوران حالات اس قدر خراب ہو گئے کہ علاقہ میدانجنگ کا منظر پیش کرنے لگا۔ اس واقعے کے بعد سی ای او آفس کی سیکورٹی پر سنگین سوالات اٹھائے گئے۔ذرائع کا کہنا ہے کہ الیکشن کمیشن نے پہلے ہی احتجاج اور ممکنہ بدامنی کے خدشے کے پیش نظر سیکورٹی بڑھانے کی درخواست کی تھی۔ اب مرکزی فورسز کی تعیناتی کے بعد انتظامیہ کو امید ہے کہ صورتحال پر قابو پایا جا سکے گا اور سماعت کا عمل بغیر کسی رکاوٹ کے مکمل ہو سکے گا۔ریاستی دارالحکومت میں سی ای او آفس کے گرد سخت سیکورٹی انتظامات اس بات کی نشاندہی کرتے ہیں کہ آنے والے دنوں میں انتخابی عمل کے دوران امن و امان برقرار رکھنا انتظامیہ کے لیے ایک بڑا چیلنج بن سکتا ہے۔
