نیتاجی جینتی کے اسٹیج سے ممتا بنرجی کی الیکشن کمیشن اور مرکز پر سخت تنقید
کولکاتہ، 23 جنوری (یو این آئی) کولکاتہ انٹرنیشنل بک فیئر کے پلیٹ فارم سے خصوصی جامع نظر ثانی (ایس آئی آر) کی منطق پر سوال اٹھانے کے ایک دن بعد مغربی بنگال کی وزیر اعلیٰ ممتا بنرجی نے جمعہ کو ایک بار پھر الیکشن کمیشن آف انڈیا اور مرکز پر سخت تنقید کی۔ انہوں نے سوال کیا کہ اگر نیتاجی سبھاش چندر بوس آج زندہ ہوتے تو کیا انہیں بھی سماعت کے لیے طلب کیا جاتا؟اطلاعات و ثقافتی امور کے محکمے کے زیرِ اہتمام دھرم تلا میں منعقدہ نیتاجی جینتی پروگرام سے خطاب کرتے ہوئے بنرجی نے ایس آئی آر کے تحت سماعت کے عمل پر سوال اٹھایا اور کہا، ’’اگر نیتاجی آج زندہ ہوتے، تو کیا انہیں بھی سماعت کے لیے بلایا جاتا؟‘‘ ان کا یہ سوال نیتاجی کےکنبہ کے رکن چندر کمار بوس کو الیکشن کمیشن کی جانب سے سماعت کا نوٹس ملنے کے چند دن بعد سامنے آیا ہے۔وزیر اعلیٰ نے پروگرام میں موجود چندر کمار بوس کی طرف اشارہ کرتے ہوئے کہا، ’’چندر یہاں موجود ہیں اور انہیں الیکشن کمیشن سے نوٹس ملا ہے۔‘‘ انہوں نے الزام لگایا کہ اس عمل نے ’’عام لوگوں میں خوف اور مصائب پیدا کر دیے ہیں۔‘‘ممتا بنرجی نے مزید دعویٰ کیا کہ ایس آئی آر سے متعلق خوف و ہراس کی وجہ سے کئی اموات اور خودکشیاں ہوئی ہیں۔ انہوں نے کہا،’’بہت سے لوگ مر رہے ہیں۔ اب تک تقریباً 110 اموات ہو چکی ہیں۔ ہر روز تین سے چار لوگ خوف کی وجہ سے اپنی زندگی کا خاتمہ کر رہے ہیں۔ الیکشن کمیشن کے خلاف کیس کیوں درج نہیں کیے جانے چاہئیں؟ مرکز کو اس کی ذمہ داری لینی چاہیے۔‘‘ اگرچہ انہوں نے سرکاری اسٹیج سے کسی سیاسی پارٹی کا نام نہیں لیا، لیکن ان کا نشانہ بالکل واضح تھا۔مرکز پر ہندوستان کی تاریخ کو دوبارہ لکھنے کی کوشش کا الزام لگاتے ہوئے بنرجی نے کہا کہ عظیم شخصیات کی توہین کی جا رہی ہے اور زبانوں کو کمزور کیا جا رہا ہے۔ نیتاجی کی خدمات کا موازنہ کرتے ہوئے انہوں نے کہا، ’’نیتاجی نے پلاننگ کمیشن بنایا تھا۔ اسے جان بوجھ کر ختم کر کے نیتی آیوگ سے بدل دیا گیا۔ کوئی نہیں جانتا کہ نیتی آیوگ کیا کرتا ہے۔‘‘وزیر اعلیٰ نے یہ سوال بھی اٹھایا کہ 23 جنوری کو ابھی تک قومی تعطیل کیوں قرار نہیں دیا گیا۔ انہوں نے کہا، ’’افسوس کی بات ہے کہ نیتاجی کے یومِ پیدائش کو ابھی تک قومی تعطیل قرار نہیں دیا گیا۔ ہمیں تو ان کی تاریخِ وفات تک معلوم نہیں ہے۔‘‘
