کالی پوجا سے پہلے ضلع بھر میں چھاپے، عوام سے صرف سبز پٹاخے استعمال کرنے کی اپیل
ہگلی: دیوالی اور کالی پوجا کے پیشِ نظر ہگلی دیہی پولیس نے غیر قانونی پٹاخوں کے خلاف بڑے پیمانے پر کارروائی شروع کر دی ہے۔ پولیس نے مختلف علاقوں میں چھاپے مار کر بھاری مقدار میں ممنوعہ پٹاخے ضبط کیے اور متعدد افراد کو گرفتار کیا۔مگرا پولیس اسٹیشن کے انچارج انسپکٹر دیپانکر سرکار کی قیادت میں ایک مہم کے دوران پولیس نے سنجیت کرماکر نامی شخص کو غیر قانونی پٹاخوں کے ساتھ گرفتار کیا۔ اسی طرح پانڈوا تھانے کی ٹیم نے ڈی ایس پی پریورت بخشی اور دھنیاکھالی کے انچارج گورنگ ڈے کی نگرانی میں چھاپہ مارا اور تقریباً 250 کلوگرام غیر قانونی پٹاخے برآمد کیے۔چنڈی تلہ کے بیگم پور، کھرسرائے اور مانساتلہ علاقوں میں ایس ڈی پی او تمل سرکار، ڈی ایس پی رجت گھوش اور انل راج کی قیادت میں مشترکہ کارروائی کے دوران بھی بڑی مقدار میں پٹاخے ضبط ہوئے۔ پولیس نے اس غیر قانونی کاروبار میں ملوث ایک شخص کو حراست میں لے کر تفتیش شروع کر دی ہے۔پولیس سپرنٹنڈنٹ نے واضح کیا کہ ضلع میں غیر قانونی آتش بازی کے خلاف زیرو ٹالرینس پالیسی اپنائی گئی ہے۔ عوام سے اپیل کی گئی ہے کہ وہ صرف “سبز پٹاخے” استعمال کریں اور شور مچانے والے پٹاخوں سے گریز کریں۔گزشتہ دنوں ہری پال کے مالاپاڑہ علاقے میں پولیس نے ایک اسکول کے قریب گھر سے 515 کلوگرام غیر قانونی پٹاخے برآمد کیے تھے، جس میں چار افراد گرفتار ہوئے۔ سی آئی پرشانت چٹوپادھیائے کے مطابق لوگوں کی شکایات کے بعد مہم کو مزید سخت کر دیا گیا ہے تاکہ حادثات سے بچا جا سکے۔دریں اثنا، داد پور پولیس اسٹیشن کی جانب سے کالی پوجا کے انتظامات کے سلسلے میں ایک سیکیورٹی میٹنگ منعقد کی گئی۔ ڈی ایس پی پریورت بخشی، ایس پی رام گوپال پال، انچارج منشی حمید الرحمن، بجلی و فائر محکموں کے افسران اور 122 پوجا کمیٹیوں کے نمائندے موجود تھے۔ میٹنگ میں بجلی کے انتظامات، ٹریفک پلان، فائر سیفٹی اور ڈی جے سسٹم پر پابندی جیسے امور پر تفصیلی گفتگو ہوئی۔
