ہائی کورٹ کا سخت نوٹس! بینکوں سے مقامی زبانوں کے مکمل استعمال کی رپورٹ فوراً طلب

کولکاتہ:کلکتہ ہائی کورٹ نے ریاست بھر میں سرگرم تمام بینکوں کو سخت انداز میں ہدایت دی ہے کہ وہ ریزرو بینک آف انڈیا کے اُس اہم سرکلر پر اپنی مکمل تعمیل کی تفصیلی رپورٹ عدالت کے سامنے پیش کریں جو 1 جولائی 2014 کو جاری ہوا تھا اور جس میں واضح طور پر کہا گیا تھا کہ تمام بینک کسٹمر سروس سے متعلق دستاویزات تین زبانوں انگریزی، ہندی اور متعلقہ مقامی زبان میں لازمی شائع کریں۔ عدالت میں سماعت کے دوران یہ بات سامنے آئی کہ ریاست کے سب سے بڑے سرکاری بینک ایس بی آئی سمیت چند معروف بینکوں نے اپنی رپورٹیں پہلے ہی جمع کر دی ہیں، لیکن بڑی تعداد میں بینک ایسے بھی ہیں جنہوں نے ابھی تک کوئی بیان یا رپورٹ داخل نہیں کی، جس پر عدالت نے ناراضگی کا اظہار کیا۔ یہ معاملہ دراصل ایک غیر منافع بخش تنظیم کی جانب سے دائر کی گئی درخواست سے جڑا ہے جس میں کہا گیا تھا کہ مغربی بنگال میں موجود ہر بینک برانچ کو آر بی آئی کے سرکلر کو فوری اور مکمل طور پر نافذ کرنا چاہیے تاکہ صارفین کو اپنی مقامی زبان، یعنی بنگالی میں بینکاری خدمات کی آسان اور شفاف رسائی مل سکے۔ سماعت کے دوران قائم مقام چیف جسٹس سوجے پال کی سربراہی والی ڈویژن بنچ نے واضح کیا کہ زبان کا مسئلہ محض سہولت کا نہیں بلکہ قانونی تقاضے کا معاملہ ہے اور ریاست میں موجود کسی بھی بینک کو اس سے انحراف کی اجازت نہیں دی جا سکتی۔ بنچ نے تاکید کرتے ہوئے کہا کہ جن بینکوں نے تاحال اپنی رپورٹ داخل نہیں کی ہے وہ دسمبر کے پہلے ہفتے میں مقرر اگلی سماعت سے قبل ہر حال میں اپنی تفصیلی تعمیل رپورٹ جمع کرائیں، ورنہ عدالت مناسب کارروائی پر غور کرے گی۔ عدالت نے یہ بھی کہا کہ صارفین کی سہولت کے لیے مقامی زبان کا استعمال نہ صرف ضروری ہے بلکہ اس میں کوتاہی کرنا عوامی مفاد کے خلاف ہے، اس لیے عدالت اس معاملے میں کسی قسم کی غفلت، تاخیر یا لاپرواہی برداشت نہیں کرے گی۔