مشرقی کولکاتہ ویٹ لینڈز میں قائم ہوگا پہلا نیچر انٹرپریٹیشن سینٹر

کولکاتہ: وزیر اعلیٰ ممتا بنرجی کی قیادت میں مغربی بنگال حکومت نے ماحولیاتی توازن اور قدرتی وسائل کے تحفظ کی سمت میں ایک اور تاریخی قدم اٹھایا ہے۔ ریاست کے دارالحکومت کولکتہ میں پہلی بار ایک “نیچر انٹرپریٹیشن سینٹر” قائم کیا جا رہا ہے، جو مشرقی کولکاتہ ویٹ لینڈز کے قلب میں بنایا جائے گا۔
یہ مرکز نہ صرف شہر کے لیے ایک تعلیمی اور سائنسی سنگ میل ثابت ہوگا بلکہ فطرت کے ساتھ انسان کے تعلق کو بھی نئی سمت دے گا۔ ماہرین کا ماننا ہے کہ یہ اقدام بنگال میں ماحولیاتی بیداری کی مہم کو ایک نئے دور میں داخل کرے گا۔
مشرقی کولکاتہ ویٹ لینڈز کو طویل عرصے سے کولکتہ کے “پھیپھڑوں” کے طور پر جانا جاتا ہے۔ یہ علاقہ ایک بین الاقوامی طور پر تسلیم شدہ ہے، جو حیاتیاتی تنوع کا خزانہ ہے۔ یہاں درجنوں اقسام کے آبی پرندے، مچھلیاں، پودے اور چھوٹے جاندار پائے جاتے ہیں جو شہر کے ماحولیاتی نظام کو متوازن رکھتے ہیں۔
یہ قدرتی ویٹ لینڈ روزانہ شہر کے گندے پانی کو صاف کر کے ایک قدرتی واٹر ٹریٹمنٹ پلانٹ کا کام انجام دیتا ہے۔ ماہرین کے مطابق، اگر یہ نظام متاثر ہوا تو کولکتہ کو سانس لینے میں بھی مشکل پیش آ سکتی ہے۔ریاستی محکمہ ماحولیات کے تحت ایسٹ کولکتہ ویٹ لینڈز مینجمنٹ اتھارٹی نے مرکز کے قیام کے لیے منصوبہ تیار کر لیا ہے۔ ابتدائی ڈیزائن تیار ہے اور ٹینڈر کا عمل شروع ہو چکا ہے۔ منصوبہ ہے کہ ایک سال کے اندر اس مرکز کی تعمیر مکمل کر لی جائے۔
یہ صرف ایک نمائش گاہ نہیں ہوگی، بلکہ ایک لرننگ اینڈ ریسرچ کمپلیکس کے طور پر کام کرے گی۔ یہاں انٹرایکٹو گیلریاں، آڈیو-ویژول ڈسپلے، فطری مشاہدے کے پلیٹ فارم، اور ماحول دوست انفراسٹرکچر شامل کیا جائے گا تاکہ طلباء، محققین اور عام شہری فطرت سے قریب تر ہو سکیں۔ مرکز میں مختلف تعلیمی سرگرمیاں منعقد ہوں گی جن میں،فیلڈ لرننگ پروگرام، بائیو ڈائیورسٹی ورکشاپس، کمیونٹی ٹریننگ کیمپ، ماحولیات پر تحقیق اور سائنسی مطالعات شامل ہوں گے۔یہ سرگرمیاں شہریوں کو ماحول کے تحفظ میں براہِ راست شمولیت کے لیے تیار کریں گی، اور نئی نسل میں قدرت کے ساتھ ذمہ دارانہ رویہ فروغ دیں گی۔
یہ منصوبہ ریاستی حکومت کے اس وسیع وژن کا حصہ ہے جس کے تحت کلائمیٹ چینج، ویٹ لینڈ پروٹیکشن اور ماحولیاتی تعلیم کو ریاستی پالیسی کا مرکزی ستون بنایا جا رہا ہے۔ماحولیاتی ماہرین کا کہنا ہے کہ اگر اس ماڈل کو کامیابی سے نافذ کیا گیا تو کولکتہ پورے ملک کے لیے ایک مثال بن سکتا ہے ، جہاں ترقی اور فطرت ایک ساتھ چلتی ہیں، اور شہری شعور ماحولیات کے ساتھ جڑا رہتا ہے۔