ایس آئی آر ڈیوٹی سے استثنیٰ کی مانگ، الیکشن کمیشن کے فیصلے کو لکاتہ ہائی کورٹ میں چیلنج

کولکاتہ :اسپیشل انٹینسیو ریویژن (SIR) کے کام سے استثنیٰ کے مطالبے پر کلکتہ ہائی کورٹ میں ایک مقدمہ دائر کیا گیا ہے۔ اس درخواست میں الیکشن کمیشن کے اس فیصلے کو چیلنج کیا گیا ہے، جس کے تحت لائف انشورنس کارپوریشن آف انڈیا (ایل آئی سی) کے افسران کو ایس آئی آر کے عمل میں شامل کرنے کی بات کہی گئی ہے۔جسٹس امریتا سنہا نے اس معاملے کو فوری بنیادوں پر دائر کرنے کی اجازت دے دی۔ درخواست گزاروں نے عدالت سے اپیل کی ہے کہ ایل آئی سی کے ترقیاتی افسران کو ایس آئی آر کے کام سے الگ رکھا جائے۔درخواست گزاروں کا مؤقف ہے کہ اگر انہیں ایس آئی آر کی ذمہ داریاں سونپی گئیں تو ان کا اصل انشورنس کام متاثر ہوگا۔ اس کی وجہ سے نہ صرف کام میں رکاوٹ آئے گی بلکہ انہیں مالی نقصان کا بھی سامنا کرنا پڑے گا۔
افسران کا کہنا ہے کہ ایس آئی آر میں شمولیت کے باعث روزمرہ کے فرائض ادا کرنا مشکل ہو جائے گا، جس سے ان کی پیشہ ورانہ ذمہ داریاں بری طرح متاثر ہوں گی۔اسی بنیاد پر عدالت سے مطالبہ کیا گیا ہے کہ ایل آئی سی کے ترقیاتی افسران کو ایس آئی آر کے عمل سے استثنیٰ دیا جائے۔ اس معاملے کی سماعت آئندہ ہفتے متوقع ہے۔