کولکاتہ میں آبی ذخائر کی تعمیر:

ترقیاتی کاموں میں کوئی رکاوٹ برداشت نہیں کی جائے گی:میئر فرہاد حکیم

کولکاتہ:محمد علی پارک میں زیر زمین پانی کے پرانے اور خستہ حال ذخیرے کی جگہ مارکس اسکوائر میں نیا آبی ذخیرہ بنانے کا منصوبہ کولکاتہ میونسپلٹی نے بنایا ہے۔ اس منصوبے کی شروعات مقامی سیاسی مسائل کی وجہ سے تاخیر کا شکار رہی، جس پر میئر فرہاد حکیم نے بدھ کو میونسپلٹی کے ماہانہ اجلاس میں افسوس کا اظہار کیا اور کہا کہ کالی پوجا اور چھٹھ پوجا کے بعد وہ خود جا کر کام کی نگرانی کریں گے۔
میئر نے واضح کیا کہ ترقیاتی کاموں میں کسی بھی قسم کی رکاوٹ برداشت نہیں کی جائے گی، اور پانی کی فراہمی جیسے حساس مسئلے میں کوئی رعایت نہیں کی جا سکتی۔وارڈ نمبر 48 کے کونسلر بسواروپ ڈے نے اجلاس میں مارکس اسکوائر میں آبی ذخائر کی تعمیر اور متعلقہ علاقے میں پینے کے پانی کے مسائل پر سوالات اٹھائے۔ میئر نے بتایا کہ وہ پہلے بھی کئی بار مارکس اسکوائر کا دورہ کر چکے ہیں اور مقامی لوگوں سے بات چیت کی، لیکن سیاسی دباؤ کی وجہ سے کام شروع نہیں ہو سکا۔
میونسپل حکام نے بتایا کہ نیا ذخیرہ جزوی طور پر زیر زمین ریزروائر اور بوسٹر پمپنگ اسٹیشن کے طور پر تعمیر کیا جائے گا تاکہ کھیتوں اور کھیل کے میدان کو کم سے کم نقصان پہنچے۔ مارکس اسکوائر میں بالغوں کے کھیل کے میدان اور بچوں کا پارک موجود ہے، جس کی وجہ سے کچھ ابتدائی پیچیدگیاں سامنے آئیں۔ علاقے کے بعض افراد نے مقامی لوگوں میں بے اطمینانی پیدا کی کہ آبی ذخائر کے قیام سے کھیت ختم ہو جائیں گے۔
میئر نے کہا جب میں جاتا ہوں تو سب ایک ہوتے ہیں، لیکن بعد میں کام نہیں ہونے دیتے۔ ترقیاتی کاموں میں بلاجواز رکاوٹیں برداشت نہیں کی جائیں گی۔ پینے کا پانی ایک حساس مسئلہ ہے۔
میونسپلٹی کے مطابق، مارکس اسکوائر میں متبادل ذخیرہ بنانے کے بعد ہی محمد علی پارک کے ریزروائر کی تزئین و آرائش ممکن ہو سکے گی۔ موجودہ ریزروائر تقریباً خستہ حال ہے اور پانچ لاکھ سے زائد افراد اس پر انحصار کرتے ہیں۔ 2019 میں اس میں شگاف پڑنے کے بعد پارک کے ایک حصے کو نقصان پہنچا تھا۔
میئر فرہاد حکیم نے اعلان کیا کہ کالی پوجا اور چھٹھ پوجا کے بعد وہ خود جا کر کام کا آغاز کریں گے تاکہ وسطی کولکاتہ میں پانی کی سپلائی متاثر نہ ہو اور ترقیاتی منصوبے بلا تعطل مکمل ہوں۔