1.87 کروڑ روپے کی واجب الادا رقم روکنے کی ‘چال’ پکڑ لی گئی
جدید بھارت نیوز سروس
کولکاتہ: ریاستی حکومت کی جانب سے جاری تازہ اطلاعات کے مطابق، مرکزی حکومت بنگال کو واجب الادا 1.87 کروڑ روپے کی رقم اب تک ادا نہیں کر رہی ہے، حالانکہ ہائی کورٹ اور سپریم کورٹ نے دہلی کو صراحتاً حکم دیا ہے کہ وہ رقم ادا کرے۔ وزیر اعلیٰ ممتا بنرجی نے ایک بار پھر مرکز کو ذمہ دار ٹھہراتے ہوئے کہا کہ دہلی کی یہ چال واضح ہو گئی ہے اور ریاست کے ترقیاتی منصوبے متاثر ہو رہے ہیں۔آج، منگل کے روز، وزیر اعلیٰ نے نوانو سے ترقی کی داستان ‘ جاری کی، جس میں گزشتہ 15 سالوں کے دوران بنگال میں ترقی کے تمام اہم کاموں کا تفصیلی حساب جاری کیا گیا۔ ممتا بنرجی نے زراعت، روزگار، صحت اور بنیادی سہولیات کے شعبوں میں ریاست کی ترقی کا زبردست پیغام دیا، اور واضح کیا کہ مرکزی حکومت کے پیسے نہ دینے کے باوجود ریاست اپنے وسائل سے ترقی کر رہی ہے۔
وزیر اعلیٰ نے دہلی پر طنز کرتے ہوئے کہا کہ مرکزی حکومت فروری میں رقم ادا کر سکتی ہے، لیکن مارچ میں اسے واپس بھی لے سکتی ہے۔ اگر ہر مالی سال میں رقم بروقت خرچ نہ ہو پائی تو یہ پیسہ واپس چلا جاتا ہے۔ ممتا بنرجی کا کہنا تھا کہ یہ وہی چال ہے جس کا مقصد ریاست کے منصوبوں کو سست کرنا اور انتخابات کے دوران سیاسی فائدہ اٹھانا ہے۔طویل عرصے سے شکایتیں ہیں کہ مرکز بنگال کے ترقیاتی پروجیکٹس کے لیے پیسے نہیں دے رہا، چاہے وہ پینے کے پانی کے منصوبے ہوں، سڑکوں کی تعمیر ہو، مکانات ہوں یا دیگر بنیادی سہولیات۔ اس کے باوجود، ریاست ہر سال اپنے وسائل سے ترقی جاری رکھے ہوئے ہے۔ اس وقت چکن سمیت کئی ضروری اشیاء کی قیمتیں بھی بڑھ گئی ہیں، جس پر ممتا نے مرکز پر اپنی برہمی کا اظہار کیا۔مزید طنز کرتے ہوئے وزیر اعلیٰ نے کہا”ووٹ سے پہلے 10،000، ووٹ کے بعد بلڈوزر”، جس سے واضح ہوتا ہے کہ وہ نہ صرف مالی بلکہ سیاسی چالوں پر بھی نظر رکھے ہوئے ہیں۔ممتا بنرجی کے مطابق، مرکز کی جانب سے رقم روکنے کا مقصد ریاست کے عوامی منصوبوں میں رکاوٹ ڈالنا اور آنے والے اسمبلی انتخابات میں فائدہ اٹھانا ہے، مگر بنگال نے اپنی ترقی کا سفر خود اپنے وسائل سے جاری رکھا ہے۔
