فلیٹ پر قبضے کی کوشش کے دوران ڈکیتی اور قتل کی کوشش کے الزامات
کولکاتہ،کولکاتہ کے مصروف علاقے قصبہ میں پیر کی صبح اس وقت ہنگامہ برپا ہو گیا جب بی جے پی کے متنازع لیڈر راکیش سنگھ اپنے بیٹے اور بیٹی کے ساتھ ایک فلیٹ پر قبضہ کرنے پہنچے۔ پولیس کے مطابق، معاملہ محض زبانی جھگڑے تک محدود نہیں رہا بلکہ ڈکیتی، قتل کی کوشش اور اسلحہ ایکٹ جیسی سنگین دفعات کے تحت مقدمہ درج کیا گیا ہے۔ کولکتہ پولیس کے قائم مقام انٹیلی جنس چیف اور ایڈیشنل کمشنر آف پولیس (زون 2) پرنب کمار نے تصدیق کی کہ راکیش سنگھ اور ان کے دونوں بچوں کو موقع سے گرفتار کیا گیا ہے۔پولیس ذرائع کے مطابق صبح تقریباً ساڑھے نو بجے راکیش سنگھ اپنے قریبی ساتھیوں کے ساتھ ایک کثیر منزلہ عمارت میں داخل ہوئے، جہاں انہوں نے مبینہ طور پر دو متنازعہ فلیٹوں پر قبضہ کرنے کی کوشش کی۔ ان فلیٹوں کی ملکیت کو لے کر کافی عرصے سے تنازعہ چل رہا تھا۔
فلیٹ کے موجودہ مالک اور مقامی بار کے مالک سپترشی خان نے پولیس کو بتایا کہ جب انہوں نے راکیش سنگھ کو روکنے کی کوشش کی تو بی جے پی لیڈر اور ان کے اہلِ خانہ نے مبینہ طور پر ان پر حملہ کر دیا۔ سپترشی کے مطابق، “راکیش سنگھ نے مجھ پر بندوق تان لی اور میرے والد پر تیز دھار ہتھیار سے وار کیا۔” سپترشی کے والد اس وقت ایک نجی اسپتال کے آئی سی یو میں زیرِ علاج ہیں اور ان کی حالت تشویشناک بتائی جا رہی ہے۔
واقعے کی اطلاع ملتے ہی قصبہ تھانے کی پولیس فورس موقع پر پہنچی اور فوری کارروائی کرتے ہوئے راکیش سنگھ، ان کے بیٹے اور بیٹی کو حراست میں لے لیا۔ تینوں کو علی پور عدالت میں پیش کیا جائے گا۔ پولیس نے بتایا کہ واقعے میں شامل دیگر چند افراد اب بھی مفرور ہیں اور ان کی گرفتاری کے لیے چھاپے مارے جا رہے ہیں۔
مقامی ذرائع کے مطابق، متعلقہ فلیٹ کبھی راکیش سنگھ کے قبضے میں تھا، لیکن بعد میں ملکیتی تنازعہ پیدا ہو گیا۔ دونوں فریقین کے درمیان کئی برسوں سے جھگڑا چل رہا تھا، جو بالآخر پیر کے روز تشدد میں بدل گیا۔
پولیس نے کیس کی تفتیش کولکاتہ پولیس کے انٹیلی جنس ڈپارٹمنٹ کے اینٹی گینگسٹر ونگ کے حوالے کر دی ہے۔ دوسری جانب، راکیش سنگھ کے قریبی ساتھی راکیش شبیر نے الزام عائد کیا ہے کہ یہ کارروائی سیاسی انتقام کا نتیجہ ہے۔ ان کے مطابق، “یہ پہلا موقع نہیں جب راکیش سنگھ کو جھوٹے مقدمات میں پھنسایا گیا ہو۔ پہلے بھی سیاسی وجوہات کی بنا پر انہیں نشانہ بنایا جا چکا ہے۔
قصبہ کے رہائشیوں کا کہنا ہے کہ فلیٹ پر قبضے کے تنازعے کے ساتھ ساتھ علاقے میں کافی دنوں سے سیاست اور ذاتی رنجشوں کا ٹکراؤ بھی بڑھتا جا رہا ہے۔ اب پولیس اس پورے معاملے کی تہہ تک جانے کے لیے ثبوت جمع کر رہی ہے تاکہ یہ واضح ہو سکے کہ یہ واقعی جرم کا واقعہ تھا یا سیاسی سازش۔
چونکہ راکیش سنگھ ماضی میں بھی کئی متنازع مقدمات میں ملوث رہ چکے ہیں، اس لیے ان کی گرفتاری نے ایک بار پھر کولکاتہ کے سیاسی حلقوں میں سنسنی پیدا کر دی ہے۔
