سب کو مل کر بحرانی صورتحال کا مقابلہ کرنے کی ضرورت ہے: ممتا بنرجی
جدید بھارت نیوز سروس
کولکتہ: بی جے پی ایم پی کھگین مرمو اور بی جے پی ایم ایل اے شنکر گھوش پر پیر کے روز متاثرہ علاقے کا دورہ کرتے ہوئے حملہ کیا گیا۔ کھگین مرمو کو خون آلود حالت میں اسپتال میں داخل کرنا پڑا۔ بی جے پی کی مرکزی قیادت نے اس واقعہ کی شدید مذمت کی ہے۔ وزیر اعلیٰ ممتا بنرجی نے شمالی بنگال جانے کے بعد اس واقعہ پر ردعمل ظاہر کیا۔
کسی بھی آفت کی صورت میں سب کو مل کر کام کرنے کا پیغام دیتے ہوئے وزیر اعلیٰ نے کہا کہ “سب کو مل کر بحرانی صورتحال کا مقابلہ کرنے کی ضرورت ہے، کسی کے اکسانے میں نہ آئیں، تاکہ کوئی ناخوشگوار واقعہ پیش نہ آئے، کسی کو تکلیف نہ پہنچے، جو چاہے آئے، بولے اور چلا جائے، سب کے حقوق ہیں، آئیں ہم سب لوگوں کے ساتھ کھڑے ہوں۔” اس کے ساتھ ہی ممتا بنرجی نے یہ بھی کہا کہ اگر آپ 30-40 کاروں کے ساتھ سیلاب سے متاثرہ علاقے میں جائیں تو غصہ بڑھ جاتا ہے۔
تاہم بی جے پی وزیر اعلیٰ کے اس پیغام کو ماننے سے گریزاں ہے۔ بی جے پی لیڈر راہل سنہا نے کہا کہ ممتا بنرجی اچھی بات کر کے معاملے کو ٹالنے کی کوشش کر رہی ہیں۔ انہوں نے کہا کہ حملہ آوروں کو سزا کیسے دی جا سکتی ہے؟ پولیس کو پہلے سے علم ہونے کے باوجود کارروائی کیوں نہیں کی گئی۔ اب ممتا ترنمول کو چھپانے کے لیے یہ سب کہہ رہی ہیں۔ ‘ بی جے پی لیڈر نے مطالبہ کیا کہ تحقیقات کا حکم دیا جائے۔
کھگین مرمو اور شنکر گھوش پر اچانک حملہ کیا گیا جب وہ ناگرکٹہ میں معائنہ کے لیے گئے تھے۔ وہ جس گاڑی میں تھے اس پر اینٹ اور پتھر پھینکے گئے اور شیشہ توڑ دیا گیا اور رکن اسمبلی پر بھی پیچھے سے حملہ کیا گیا۔ کھگین مرمو کے چہرے سے خون بہنے لگا۔ شنکر گھوش اسے ہسپتال لے گئے۔ بی جے پی لیڈروں نے ترنمول حامیوں پر الزام کی انگلی اٹھائی ہے۔ تاہم ترنمول قیادت نے ان الزامات کی تردید کی ہے۔ شمالی بنگال کی ترقی کے وزیر ا ±دین گوہا نے کہا کہ عام لوگوں نے غصے میں یہ حملہ کیا۔ شوویندو ادھیکاری سے لے کر سکانتا مجمدار تک سبھی نے اس واقعہ کی مذمت کی ہے۔
