سی بی آئی کورٹ سے ریٹائرڈ آئی اے ایس کے خلاف سمن جاری
جدید بھارت نیوز سروس
رانچی، 21 نومبر:۔ رانچی سی بی آئی کی خصوصی عدالت نے سابق ہیلتھ سکریٹری اور ریٹائرڈ آئی اے ایس افسر ارون کمار سنگھ کے خلاف سمن جاری کیا ہے۔ عدالت نے اوشا مارٹن مائنز مختص گھوٹالہ سے متعلق کیس میں ارون کمار کے خلاف سی بی آئی کی طرف سے دائر چارج شیٹ کا نوٹس لیتے ہوئے سمن جاری کیا ہے۔ یہ معاملہ سال 2005 میں اوشا مارٹن کو کانوں کی الاٹمنٹ میں مبینہ بدعنوانی سے متعلق ہے۔ ارون سنگھ کے علاوہ اس وقت کے کان کنی ڈائریکٹر اندردیو پاسوان سمیت تین دیگر بھی ملزم ہیں۔ دیگر تین لوگوں میں اوشا مارٹن کمپنی کی انتظامیہ کے لوگ شامل ہیں۔ سی بی آئی نے کیس درج کرنے کے لیے ڈی او پی ٹی (محکمہ عملہ اور تربیت) سے اجازت طلب کی تھی۔ لیکن تقریباً ایک سال گزرنے کے بعد بھی مقدمہ درج کرنے کی اجازت نہ ملنے پر عدالت نے از خود نوٹس لے لیا۔ 2005 میں، اوشا مارٹن کمپنی کو مغربی سنگھ بھوم ضلع کے گھٹکوری میں لوہے کی کان الاٹ کی گئی تھی۔ اس میں مبینہ کرپشن کی گئی تھی۔ آئی اے ایس ارون کمار سنگھ اس وقت کان کنی محکمہ کے سکریٹری تھے۔ اس شکایت پر سی بی آئی کی دہلی یونٹ نے انسداد بدعنوانی ایکٹ کی دفعات کے تحت ایف آئی آر نمبر 220/2016 درج کی تھی اور ایف آئی آر میں اوشا مارٹن کے پروموٹرز اور کان کنی محکمہ کے افسران کو ملزم بنایا گیا تھا۔ ایف آئی آر میں کہا گیا تھا کہ کان کی الاٹمنٹ کے لیے مرکزی حکومت کو بھیجی گئی سفارش میں ریاستی حکومت کے افسران نے مبینہ طور پر اوشا مارٹن کے حق میں جانبداری کا مظاہرہ کیا تھا۔ کمپنی نے مبینہ طور پر وعدہ کیا تھا کہ وہ ہاٹ گمہریا میں واقع اپنے اسٹیل پلانٹ میں لوہے کا استعمال کرے گی۔ کمپنی نے ریاستی حکومت کو ایک انڈرٹیکٹنگ بھی دی تھی۔ تاہم، سی بی آئی نے الزام لگایا کہ کمپنی نے بعد میں اس بیان کو واپس لے لیا اور کہا کہ کابینہ کے نوٹ میں اس کا کوئی خاص ذکر نہیں تھا۔
