آج آئین کو ہاتھ میں رکھنے اور حقوق کو ذہن میں رکھنے کا دن ہے: شلپی نیہا ترکی
بابا صاحب کی جینتی منانے کے بعد کانگریس نے نکالی پرکشش جھانکی
جدید بھارت نیوز سروس
رانچی،14؍اپریل : ریاستی زراعت، مویشی پروری اور کوآپریٹیو محکمہ کی وزیر شلپی نیہا ترکی نے کانگریس کی طرف سے بھارت رتن ڈاکٹر بھیم راؤ امبیڈکر کی یوم پیدائش پر منعقد انسانی زنجیر پروگرام میں حصہ لیا۔ امبیڈکر چوک سے راجندر چوک تک کانگریس کارکنوں نے ہاتھوں میں آئین لے کر بھارت رتن ڈاکٹر بھیم راؤ امبیڈکر کو یاد کیا۔ جھارکھنڈ کانگریس کے ریاستی انچارج کے راجو، ریاستی صدر کیشو مہتو کملیش نے انسانی زنجیر کے اس پروگرام کی قیادت کی۔ اس موقع پر وزیر زراعت وزیر شلپی نیہا ترکی نے کہا کہ کانگریس کے انسانی زنجیر کے پروگرام نے آئین کو ایک دوسرے سے جوڑے رکھنے کا پیغام دیا ہے۔ آج ہمیں اپنے ہاتھ میں آئین اور اپنے ذہنوں میں حقوق کے حصول کا عزم لے کر آگے بڑھنا ہے۔ انہوں نے کہا کہ آج ڈاکٹر بھیم راؤ امبیڈکر کو خراج عقیدت پیش کرنے والوں کی بھیڑ ہے۔ جو لوگ کل تک اپنے تنظیمی دفاتر میں ترنگا لہرانے سے گریز کرتے تھے آج وہ بھی جئے بھیم کا نعرہ لگا رہے ہیں۔ اس سیاست کو سمجھنے کی ضرورت ہے۔ ریاست میں ایس سی/ ایس ٹی/ پسماندہ/ اقلیتی برادری کے حقوق پر مسلسل حملے ہو رہے ہیں۔ آئین کے تحت دیئے گئے حقوق کو ختم کرنے کی سازش کی جا رہی ہے۔ ہمیں ایسی تمام سازشوں کے خلاف متحد ہو کر آواز اٹھانے کی ضرورت ہے۔ یہ آپ اور ہماری مشترکہ کوششوں سے ہی ممکن ہے۔ اس دوران وزیر شلپی نیہا ترکی نے آئین کے تحفظ کے لیے بنائے گئے پرکشش جھانکی میں بھی حصہ لیا۔ یہ جھانکی کانگریس کے ریاستی ورکنگ صدر اور سابق وزیر بندھو ترکی کی قیادت میں نکالی گئی ۔
