نئی دہلی، 25 مارچ (یو این آئی) وزیر اعظم نریندر مودی پر چند سرمایہ داروں کے لیے کام کرنے کا الزام لگاتے ہوئے یوتھ کانگریس نے منگل کو مرکزی حکومت کی پالیسیوں کے خلاف پارلیمنٹ کا گھیراؤ کرنے کے لیے مارچ کیا اور کہا کہ ملک کے نوجوان اپنے حقوق کی لڑائی لڑ رہے ہیں اور نوجوان تنظیم اس جنگ کو سڑکوں سے پارلیمنٹ تک لڑے گی۔یوتھ کانگریس کے صدر ادے بھانو چب نے آج یہاں مظاہرین سے خطاب کرتے ہوئے کہا کہ حکومت صرف ارب پتیوں کے لیے کام کر رہی ہے اور اب صرف یوتھ کانگریس کے نعرے ‘نوکریاں دو، زنجیر نہیں، کی آواز سڑکوں سے لے کر پارلیمنٹ تک بے روزگاری، منشیات کی لت، اگنی ویر اور مرکزی حکومت کی ناکامیوں کے خلاف گونجے گی۔ اڈانی-امبانی کے ساتھ دوستی نبھانے سے ملک کی خدمت نہیں ہوتی، اگر واقعی ملک کی خدمت کرنا چاہتے ہیں تو نوجوانوں کے مستقبل کے بارے میں سوچنا ہوگا۔پارلیمنٹ ہاؤس کے قریب جنتر منتر پر منعقدہ اس پروگرام میں ہزاروں نوجوانوں نے حصہ لیا۔
جس میں کانگریس کے جنرل سکریٹری رندیپ سنگھ سرجے والا اور پارٹی کے قومی سکریٹری نیرج کندن سمیت کئی لیڈر موجود تھے۔مسٹر چب نے کہا کہ جس غیر انسانی طریقے سے ہندوستانی شہریوں کو امریکہ سے ہندوستان بھیجا گیا ہے۔ ان کے ہاتھوں میں ہتھکڑیاں اور پاؤں میں زنجیریں تھیں اور یہ صورتحال انتہائی شرمناک ہے۔ یہ صورتحال عالمی سطح پر ہندوستان اور ہندوستانیوں کی توہین ہے۔انہوں نے حکومت کے بجٹ کو نوجوان مخالف قرار دیتے ہوئے کہا کہ 3.2 کروڑ لوگوں کو چھوڑ کر ملک کے باقی 140 کروڑ عوام کو اس سے دھوکہ دیا گیا ہے۔ اس بجٹ میں روزگار پیدا کرنے، مہنگائی کم کرنے یا معاشی عدم مساوات کے خاتمے کے لیے کچھ نہیں کیا گیا۔ پورے بجٹ کو سننے کے بعد یہ واضح ہو جاتا ہے کہ بھارتیہ جنتا پارٹی کی حکومت بہار کے ووٹروں اور متوسط طبقے کو اپنی طرف متوجہ کرنے کی کوشش میں ہے۔
