National

وَن نیشن، وَن الیکشن: لاء کمیشن جلد ہی کووند کمیٹی کے ساتھ اپنا روڈ میپ کرے گا شیئر

130views

سابق صدر جمہوریہ رام ناتھ کووند کی صدارت والی اعلیٰ سطحی کمیٹی وَن نیشن، وَن الیکشن (ایک ملک، ایک انتخاب) کے امکانات کو تلاش کرنے میں مصروف ہے۔ اس سلسلے میں ایک بڑی خبر یہ سامنے آ رہی ہے کہ لاء کمیشن اپنا روڈ میپ یعنی خاکہ اگلے ہفتہ کووند کمیٹی کے ساتھ شیئر کرے گا۔ دراصل کمیٹی نے لاء کمیشن کو 25 اکتوبر کو مدعو کیا ہے تاکہ وہ وَن نیشن، وَن الیکشن کے بارے میں اس کی رائے جان سکے۔

قابل ذکر ہے کہ اعلیٰ سطحی کمیٹی نے حال ہی میں اپنی پہلی میٹنگ میں وَن نیشن، وَن الیکشن کے تعلق سے سیاسی پارٹیوں کی رائے جانے کا فیصلہ کیا تھا اور اب انھوں نے ملک میں ایک ساتھ انتخاب کرانے پر ان کی رائے جاننے کے لیے خط بھی لکھا ہے۔ میڈیا ذرائع نے اس خط کا حوالہ دیتے ہوئے کہا کہ سیاسی پارٹیوں کو بھیجے گئے خط میں ان سے ’مناسب تاریخ‘ پر ان کے ساتھ بات چیت کا مطالبہ کیا ہے۔ بتایا جاتا ہے کہ پارٹیوں کو آئندہ تین ماہ میں تحریری طور پر اپنے نظریات بھیجنے کا متبادل بھی دیا گیا ہے۔

بہرحال، جسٹس ریتو راج اوستھی کی صدارت والا لاء کمیشن مدت کار کو بڑھا کر یا گھٹا کر سبھی اسمبلی انتخابات کو یکجا کرنے کے فارمولے پر کام کر رہا ہے، تاکہ یہ انتخاب 2029 کے لوک سبھا انتخاب میں ساتھ کرائے جا سکیں۔ لاء کمیشن لوک سبھا، ریاستی اسمبلیوں اور مقامی بلدیوں کے لیے یکساں ووٹر لسٹ یقینی بنانے کے لیے ایک نظام تیار کر رہا ہے تاکہ اخراجات اور مین پاور کے استعمال کو کم کیا جا سکے۔ 2029 سے ریاست اور لوک سبھا دونوں کے انتخاب ایک ساتھ کرانے کے لیے مختلف اسمبلی انتخابات کو یکجا کرنے کے لیے کمیشن اسمبلیوں کی مدت کار کو کم کرنے یا بڑھانے کا مشورہ دے سکتا ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.