National

لوک سبھا انتخاب 2024: کانگریس ورکنگ کمیٹی کی میٹنگ کل، انتخابی منشور پر لگے گی مہر

63views

کانگریس ورکنگ کمیٹی (سی ڈبلیو سی) کی میٹنگ منگل یعنی 19 مارچ کو ہونے والی ہے جس میں لوک سبھا انتخاب کے پیش نظر پارٹی کے انتخابی منشور پر آخری مہر لگے گی۔ سی ڈبلیو سی میٹنگ کے بعد پارٹی صدر ملکارجن کھڑگے کی صدارت میں کانگریس کی مرکزی الیکشن کمیٹی (سی ای سی) کی بھی میٹنگ ہوگی جس میں 19 اپریل سے شروع ہونے والے سات مراحل کے لوک سبھا انتخاب کے لیے پارٹی کے بقیہ امیدواروں کے ناموں کو آخری شکل دی جائے گی۔

پارٹی جنرل سکریٹری نے اس سلسلے مین اتوار کو ہی ایک بیان دیا تھا جس میں کہا تھا کہ پارٹی کی اعلیٰ سطحی پالیسی ساز یونٹ ورکنگ کمیٹی کی میٹنگ میں مسودہ انتخابی منشور کو اپنی منظوری دے گی جس میں پانچ ’نیائے‘ (انصاف) کے لیے پانچ پانچ ’گارنٹی‘ یعنی مجموعی طور پر 25 گارنٹیاں دی گئی ہیں۔

جئے رام رمیش نے میڈیا سے مخاطب ہوتے ہوئے کہا تھا کہ پارٹی پانچ نیائے- ’بھاگیداری نیائے‘، ’کسان نیائے‘، ’ناری نیائے‘، شرمک نیائے‘ اور ’یوا نیائے‘ کے ایشو پر انتخاب لڑے گی۔ ان میں مجموعی طور پر 25 گارنٹیاں ہوں گی جن کا اعلان کانگریس صدر کھڑگے اور سابق صدر راہل گاندھی پہلے ہی کر چکے ہیں۔

بہرحال، سبھی کو انتظار کانگریس کی اس فہرست کا ہے جس میں لوک سبھا کے باقی امیدواروں کے ناموں کا اعلان کیا جائے گا۔ ابھی تک کانگریس نے امیدواروں کی دو فہرست جاری کی ہے جس میں مجموعی طور پر 82 امیدواروں کے نام شامل ہیں۔ اتر پردیش اور بہار جیسی ریاستوں میں کسی بھی سیٹ کے لیے کانگریس نے اپنے امیدوار کے نام کا اعلان نہیں کیا ہے۔ اتر پردیش میں کانگریس کا اتحاد سماجوادی پارٹی کے ساتھ ہے اور بہار میں آر جے ڈی و بایاں محاذ کے ساتھ مل کر کانگریس نے بی جے پی کو شکست دینے کا عزم ظاہر کیا ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.