جب بھی کھیلنے آتا ہوں، 120 فیصد جذبے کے ساتھ آتا ہوں: وراٹ کوہلی

بنگلورو، 29 مارچ (یو این آئی) وراٹ کوہلی نے ٹی-20 کرکٹ میں واپسی کرتے ہوئے 38 گیندوں پر 69 رنز بنائے اور دفاعی چیمپیئن رائل چیلنجرز بنگلورو (آر سی بی) کو سن رائزرز حیدرآباد (ایس آر ایچ) کے خلاف پہلے ہی میچ میں فتح دلا دی۔ جیت کے بعد انہوں نے کہا کہ اس فارمیٹ سے دور گزارے گئے وقت نے انہیں ترو تازہ اور پرجوش رہنے اور 120 فیصد توانائی کے ساتھ واپسی کرنے میں مدد دی۔کوہلی کا آخری ٹی-20 میچ آئی پی ایل 2025 کا فائنل تھا، جسے جیت کر آر سی بی نے اپنا پہلا ٹائٹل حاصل کیا تھا۔ انہوں نے 202 رنز کے ہدف کو محض 15.4 اوورز میں حاصل کر لیا۔ اس رن چیز میں کوہلی ناٹ آؤٹ رہے۔وراٹ کوہلی نے کہا کہ ”دیکھیے، گزشتہ 15 سال میں جس طرح کا شیڈول رہا ہے اور میں نے جتنی کرکٹ کھیلی ہے، میرے لیے ہمیشہ تھکن کا خطرہ زیادہ تھا۔ اس لیے یہ وقفے میرے لیے بہت مددگار ثابت ہوئے۔ میں ترو تازہ اور پرجوش رہتا ہوں۔ جب بھی میں کھیلنے لوٹتا ہوں، 120 فیصد جوش و جذبے کے ساتھ لوٹتا ہوں۔ میں بغیر تیاری کے واپس نہیں آتا۔”انہوں نے مزید کہا کہ ذہنی سکون اور جسمانی فٹنس کی وجہ سے وہ ٹیم کے لیے بہتر تعاون کر پاتے ہیں۔ وہ صرف اپنی جگہ برقرار رکھنے کے لیے نہیں بلکہ مسلسل اچھی کارکردگی دکھانے کے لیے کھیلتے ہیں۔آئی پی ایل سے قبل جنوری میں نیوزی لینڈ کے خلاف ون ڈے سیریز میں کوہلی نے 93، 23 اور 124 رنز بنائے تھے اور وہ ہندوستان کے سب سے زیادہ رنز بنانے والے بلے باز تھے۔ اس سے قبل دسمبر میں جنوبی افریقہ کے خلاف بھی انہوں نے دو سنچریوں کی مدد سے 302 رنز بنائے تھے۔سن رائزرز حیدرآباد کے خلاف کوہلی نے اپنی اننگز میں پانچ چوکے اور پانچ چھکے لگائے۔ انہوں نے 16ویں اوور میں ہرشل پٹیل کو مسلسل باؤنڈریز لگا کر میچ ختم کیا۔ آر سی بی کا اگلا مقابلہ 5 اپریل کو چنئی سپر کنگز کے خلاف ہوگا۔