سنسنی خیز مقابلے کے بعد امریکہ سیمی فائنل میں داخل
پرتھ،7 جنوری (یواین آئی )پرتھ کے آر اے سی ایرینا میں ٹینس کا وہ تاریخی معرکہ دیکھنے کو ملا جس نے شائقین کے دلوں کی دھڑکنیں تیز کر دیں۔ کوکو گوف اور کرسچن ہیرسن نے اپنی مہارت اور اعصاب شکن صبر کا مظاہرہ کرتے ہوئے یونائیٹڈ کپ کے مکسڈ ڈبلز میں یونان کو شکست دے کر امریکہ کے لیے سیمی فائنل کا ٹکٹ کنفرم کر لیا۔ اس جیت کے ساتھ ہی امریکہ کی تیسری بار عالمی ٹائٹل جیتنے کی امیدیں روشن ہو گئی ہیں۔کوارٹر فائنل کا فیصلہ کن مرحلہ مکسڈ ڈبلز تھا، جہاں یونان کے اسٹیفانوس ستسپاس اور ماریا سکاری نے پہلا سیٹ جیت کر امریکی کیمپ میں کھلبلی مچا دی تھی۔ لیکن گوف اور ہیرسن نے ہمت نہ ہاری اور دوسرے سیٹ میں شاندار واپسی کی۔ میچ ٹائی بریکر تک گیا جہاں امریکی جوڑی نے 4-6، 6-4 اور 10-8 سے فتح سمیٹ کر یونان کا غرور خاک میں ملا دیا۔سنگل مقابلے کے آغاز میں عالمی نمبر ون امریکی کھلاڑی کوکو گوف نے ماریا سکاری کو محض ایک گھنٹے 26 منٹ میں 6-3 اور 6-2 سے شکست دے کر امریکا کو برتری دلائی۔ گوف نے اپنی سروس کی خامیاں دور کرتے ہوئے بہترین کھیل پیش کیا۔یونان کے اسٹیفانوس ستسپاس نے امریکہ کے ٹیلر فرٹز (عالمی نمبر 9) کو 6-4 اور 7-5 سے ہرا کر مقابلہ برابر کر دیا۔ ستسپاس کے لیے یہ جیت انتہائی اہم تھی کیونکہ 18 ماہ بعد انہوں نے کسی ‘ٹاپ 10’ کھلاڑی کو شکست دی ہے۔گوف نے اپنی سروس میں حیرت انگیز بہتری دکھائی۔ پچھلے میچ میں 14 ڈبل فالٹس کرنے والی گوف نے اس اہم میچ میں اسے کم کر کے صرف 6 کر دیا اور اپنی پہلی سروس پر 76 فیصد پوائنٹس جیتے۔ دوسری طرف ستسپاس نے 80 فیصد فرسٹ سروس پوائنٹس جیت کر ثابت کیا کہ وہ اب بھی عالمی ٹینس کے بڑے کھلاڑی ہیں۔امریکی ٹیم اب پرتھ سے سڈنی روانہ ہوگی جہاں سیمی فائنل میں ان کا سامنا پولینڈ اور آسٹریلیا کے درمیان ہونے والے کوارٹر فائنل کے فاتح سے ہوگا۔
ٹینس ماہرین کے مطابق، جس فارم میں امریکی کھلاڑی نظر آ رہے ہیں، وہ ٹائٹل کے مضبوط ترین امیدوار ہیں۔
