پاکستان نے افغانستان کو سنسنی خیزمقابلے کے بعد ہرادیا
ہرارے،28 دسمبر(یو این آئی ) زمبابوے میں تین ملکی انڈر۔ 19 ون ڈے سیریز میں پاکستان نے افغانستان کو ڈرامائی مقابلے کے بعد ایک وکٹ سے ہرادیا۔وکٹ کیپر حمزہ ظہور کی شاندار ناقابل شکست نصف سنچری نے پاکستان انڈر۔19 کو افغانستان انڈر۔ 19 کے خلاف ایک وکٹ کی ڈرامائی جیت سے ہمکنار کردیا۔ ہرارے اسپورٹس کلب میں تین ملکی انڈر 19 ون ڈے سیریز کے میچ میں حمزہ ظہور نے ناقابل شکست 68 رنز کی اننگز کھیل کر ایسے موقع پر اپنی ٹیم کو جیت سے ہمکنار کیا جب 201 کے اسکور پر 9 وکٹیں گرچکی تھیں۔پاکستان انڈر۔ 19نے ٹاس جیت کر افغانستان انڈر۔ 19 کو پہلے بیٹنگ دی جو 50 اوورز میں 226 رنز بناکر آئوٹ ہوگئی۔عثمان سعادت 75 رنز کے ساتھ ٹاپ اسکورر رہے۔عثمان خان نے 37 رنز دے کر4 وکٹیں حاصل کیں۔محمد صیام اور دانیال علی خان نے دو دو کھلاڑیوں کوآئوٹ کیا۔سمیر منہاس نے تین کیچ کیے۔جواب میں پاکستان انڈر۔ 19 نے 49 اعشاریہ3 اوورز میں 9 وکٹوں کے نقصان پر مطلوبہ اسکور پورا کرلیا۔سمیرمنہاس پہلے ہی اوور میں صفر پر آوٹ ہوگئے۔ عثمان خان 20 اور علی حسن بلوچ 14 رنز بناکر آوٹ ہوئے تو مجموعی اسکور42 رنز تھا۔ اس موقع پر کپتان فرحان یوسف اور احمد حسین نے 89 رنز کی شراکت قائم کی۔ فرحان یوسف نے 6 چوکوں اور 2چھکوں کی مدد سے 65 رنز کی اننگز کھیلی۔ احمد حسین نے31 رنز بنائے لیکن وقفے وقفے سے گرنے والی وکٹوں کی وجہ سے پاکستان ٹیم کے لیے صورتحال مشکل ہوگئی تھی ۔اس موقع پر حمزہ ظہور نے ایک چھکے اور 8 چوکوں کی مدد سے68 رنز ناٹ آوٹ کی ذمہ دارانہ اننگز کھیلی۔ آخری بلے باز نقاب شفیق نے 9 گیندوں پر ایک رن ناٹ آئوٹ کے ساتھ حمزہ کا پورا پورا ساتھ دیا۔سلام خان نے 44 رنز دے کر 4 وکٹیں حاصل کیں۔وکٹ کیپر محبوب خان نے 4 کیچ اور ایک کھلاڑی کو اسٹمپ آؤٹ کیا۔ تین ملکی سیریز میں تیسری ٹیم میزبان زمبابوے ہے۔پاکستان ٹیم اپنا دوسرا میچ پیر کو زمبابوے کے خلاف کھیلے گی۔ 2جنوری کو اس کا تیسرا میچ افغانستان اور 4 جنوری کو زمبابوے کے خلاف ہوگا۔سیریز کا فائنل 6 جنوری کو کھیلا جائے گا۔
