یو ایس اوپن کے پہلے راونڈ میں شکست کے بعد دو مرتبہ کی ومبلڈن چیمپئن پیٹرا کویٹووا نے ٹینس کو الوداع کہا

نیویارک، 26 اگست (ہ س)۔ دو بار ومبلڈن کی فاتح اور سابق عالمی نمبر 2 چیک ریپبلک کی اسٹار ٹینس کھلاڑی پیٹرا کویٹووا یو ایس اوپن 2025 کے پہلے راونڈ میں ہارنے کے بعد پروفیشنل ٹینس سے ریٹائر ہو گئیں۔کویٹووا کو پیر کو فلشنگ میڈوز میں کھیلے گئے پہلے راونڈ میں فرانس کی ڈیان پیری کے ہاتھوں 1-6، 0-6 سے شکست کا سامنا کرنا پڑا۔میچ کے بعد کی پریس کانفرنس میں بائیں ہاتھ کی 35 سالہ کھلاڑی جذباتی ہوگئیں اور اپنے کیریئر کو الوداع کہہ دیا۔میچ کے بعد کورٹ پر کویٹووا کی آنکھوں سے آنسو چھلک پڑے اور انہوں نے اپنے شوہر اور کوچ جیری وینیک کو گلے لگایا۔ دونوں گزشتہ سال جولائی میں بیٹے پیٹر کے والدین بنے تھے، جس کے بعد کویٹووا 17 ماہ کے وقفے کے بعد رواں سال کورٹ میں واپس آئی تھیں۔کویٹووا نے اس سال کے شروع میں اعلان کیا تھا کہ وہ یو ایس اوپن کے بعد ٹینس سے ریٹائر ہو جائیں گی۔اپنے شاندار کیریئر میں، کویٹووا نے 2011 اور 2014 میں ومبلڈن خطاب جیتا تھا۔ 2019 میں، وہ آسٹریلین اوپن میں رنر اپ تھیں اور عالمی درجہ بندی میں نمبر 2 پر پہنچ گئیں۔دسمبر 2016 میں کویٹووا کا کیریئر اس وقت مشکل میں پڑ گیا جب ایک حملہ آور اس کے گھر میں داخل ہوا اور اس پر چاقو سے حملہ کر دیا تھا۔ انہیں اپنی بائیں کلائی اور انگلیوں کی سرجری کرانی پڑی۔ اس کے باوجود، وہ صرف چھ ماہ بعد فرنچ اوپن میں کورٹ پر واپس آئی اور اپنا پہلا ہی میچ جیت لیا۔اپنے کیرئیر کو یاد کرتے ہوئے کویٹووا نے کہا کہ میں بہت سی چیزوں پر فخر محسوس کرتی ہوں، خاص طور پر ذہنی طاقت۔ چوٹوں اور بیماریوں کے باوجود ہمیشہ ٹاپ 10 میں رہنا میرے لیے ایک خاص کامیابی ہے۔