طوفانِ یمال: نوجوان فٹبالر کے کمال نے بارسلونا کی پوزیشن ناقابلِ تسخیر بنا دی

بارسلونا، 12 اپریل ( یو این آئی)لامین یمال کے ایک گول اور دو اسسٹس کی بدولت بارسلونا نے ڈربی مقابلے میں ایسپانیول کو 1-4 سے شکست دے کر لا لیگا ٹائٹل کے دفاع کی جانب مضبوط قدم بڑھا دیا ہے۔ اس فتح کے بعد کاتالان کلب نے دوسرے نمبر پر موجود حریف ریال میڈرڈ پر 9 پوائنٹس کی واضح برتری حاصل کر لی ہے۔ہنسی فلک کی ٹیم نے میچ کا آغاز جارحانہ انداز میں کیا۔ ہسپانوی اسٹار فیران ٹوریس نے جنوری کے بعد اپنا پہلا گول اس وقت اسکور کیا جب 18 سالہ ونگر لامین یمال نے کارنر کک کے ذریعے بہترین پاس دیا۔ یمال نے جلد ہی دوسرا جادوئی پاس اپنے بوٹ کے بیرونی حصے سے دیا، جسے ٹوریس نے گول میں بدل کر اسکور 0-2 کر دیا۔دوسرے ہاف کے آغاز میں بارسلونا کا ایک گول آف سائیڈ کی وجہ سے مسترد کر دیا گیا، جس کے فوراً بعد ایسپانیول کے پول لوزانو نے ایک زوردار ہٹ کے ذریعے گول کر کے اسکور 1-2 کر کے میچ میں سنسنی پیدا کر دی۔میچ کے اختتامی منٹس میں بارسلونا نے ایک بار پھر میچ پر گرفت مضبوط کر لی۔87 ویں منٹ میں لامین یمال نے گیند چھین کر اسے جال کی راہ دکھائی۔ متبادل کھلاڑی کے طور پر آنے والے مارکس راشفورڈ نے فرینکی ڈی جونگ کے کراس پر شاندار والی (Volley) کے ذریعے چوتھا گول اسکور کیا۔بارسلونا کو منگل کے روز چیمپئنز لیگ کے کوارٹر فائنل میں اٹلیٹیکو میڈرڈ کا سامنا کرنا ہے، جہاں انہیں پہلے مرحلے کی 0-2 کی شکست کا بدلہ لینا ہے۔ اس اہم میچ کے باوجود کوچ ہنسی فلک نے پیڈری اور یامال جیسے اہم کھلاڑیوں کو پورے میچ میں میدان میں رکھا تاکہ لیگ میں ٹیم کی برتری برقرار رہے۔اس فتح کے ساتھ بارسلونا اب سات میچز باقی رہتے ہوئے انتہائی مستحکم پوزیشن میں ہے، جبکہ ریال میڈرڈ کی جیرونا کے خلاف ڈرا نے بارسا کی راہ مزید ہموار کر دی ہے۔