بارش کی وجہ کر زمبابوے اور آئرلینڈ میچ منسوخ ہونے سے کنگاروز کا سفر ختم
کینڈی، سری لنکا ،17؍فروری (ایجنسی):2021 کی چیمپیئن آسٹریلیا ٹی-20 ورلڈ کپ 2026 کے لیگ راؤنڈ سے ہی باہر ہو گئی ہے۔ منگل کو زمبابوے اور آئرلینڈ کے درمیان میچ بارش کی وجہ سے منسوخ ہو گیا۔ کینڈی کے پلے کیلے اسٹیڈیم میں میچ کا ٹاس بھی نہ ہو سکا۔ اسی کے ساتھ زمبابوے نے سپر-8 میں جگہ بنا لی ہے۔ایک دن پہلے کنگاروز سری لنکا کے خلاف 8 وکٹوں سے ہار گئے تھے۔ انہیں 13 فروری کو زمبابوے نے 23 رنز سے شکست دی تھی۔ اب آسٹریلیا کو 20 فروری کو عمان کے خلاف کھیلنا ہے۔ اسے جیت کر بھی مچل مارش کی ٹیم اگلے راؤنڈ میں نہیں پہنچ سکے گی۔آسٹریلوی ٹیم اس ٹورنامنٹ کی تاریخ میں دوسری بار گروپ اسٹیج سے باہر ہوئی ہے۔ اس سے پہلے 2009 میں رکی پونٹنگ کی کپتانی میں ٹیم لیگ راؤنڈ سے باہر ہو گئی تھی۔
اس ورلڈ کپ میں پہلا میچ منسوخ ہوا
موجودہ ورلڈ کپ میں یہ پہلا میچ ہے جو منسوخ ہوا ہے۔ وہیں، ٹورنامنٹ کی تاریخ میں اب تک مجموعی طور پر 8 میچ منسوخ ہو چکے ہیں۔ 2016 کے ایڈیشن میں 2 میچ منسوخ ہوئے تھے۔ 2007، 2010، 2012، 2022 اور 2024 میں بھی ایک ایک میچ منسوخ ہوا تھا۔
میچ منسوخ ہونے سے آسٹریلیا باہر کیسے؟
گروپ بی سے سری لنکا کی ٹیم سپر-8 میں پہنچ چکی ہے۔ ہر گروپ سے دو ٹیموں کو سپر-8 میں جانا ہے۔ عمان پہلے ہی باہر ہو چکی ہے۔ اب دوسرے مقام کے لیے زمبابوے، آسٹریلیا اور آئرلینڈ کے درمیان دوڑ چل رہی تھی۔ زمبابوے کے پاس 4 پوائنٹس تھے، جبکہ آسٹریلیا اور آئرلینڈ کے پاس 2-2 پوائنٹس تھے۔ میچ منسوخ ہونے سے زمبابوے کو ایک پوائنٹ مل گیا جس سے اس کے 5 پوائنٹس ہو گئے۔ ایسی صورت میں آسٹریلیا اپنا آخری میچ جیت کر بھی زمبابوے سے آگے نہیں نکل پائے گی۔
