کیا کولکتہ اپنی پہلی جیت درج کر پائے گی؟
کولکتہ،8 اپریل (یواین آئی ) انڈین پریمیئر لیگ (آئی پی ایل ) 2026 کے سیزن میں اب تمام نظریں کولکتہ کے تاریخی میدان ایڈن گارڈنز پر جمی ہیں، جہاں جمعرات کو ہوم ٹیم کولکتہ نائٹ رائیڈرز (کے کے آر) اپنی پہلی فتح کی تلاش میں لکھنؤ سپر جائنٹس (ایل ایس جی ) کا مقابلہ کرے گی۔ یہ میچ کے کے آر کے لیے محض ایک مقابلہ نہیں بلکہ اپنے گرتے ہوئے گراف کو سنبھالنے کا آخری موقع دکھائی دیتا ہے۔کولکتہ نائٹ رائیڈرز کی کہانی اب تک ‘اتار چڑھاؤ’ کا شکار رہی ہے۔ ٹیم کے تمام 11 کھلاڑیوں کا ایک ساتھ پرفارم نہ کر پانا کپتان کے لیے دردِ سر بنا ہوا ہے۔ اجنکیا رہانے نے 67 رنز کی اننگز سے امیدیں جگائیں لیکن حالیہ میچوں میں وہ سنگل ڈیجٹ پر آؤٹ ہو رہے ہیں۔ فن ایلن کا اسٹرائیک ریٹ تو شاندار ہے مگر تسلسل غائب ہے۔ نوجوان بلے باز انگکرش رگھونشی (دو نصف سنچریاں، 110 رنز) اب تک ٹیم کے سب سے کامیاب بلے باز ثابت ہوئے ہیں۔ رنکو سنگھ (33 اور 35 رنز) ایک بار پھر ٹیم کے سب سے بھروسہ مند مہرہ ثابت ہو رہے ہیں، تاہم کیمرون گرین کی خراب فارم (3 میچوں میں 24 رنز) تشویشناک ہے۔بولنگ میں بلیسنگ موزاربانی (ایک میچ میں 4 وکٹیں) کامیاب رہے ہیں، لیکن ویبھو اروڑا اور کارتک تیاگی کافی مہنگے ثابت ہو رہے ہیں۔ ٹیم کے اسپنرز سنیل نارائن اور ورون چکرورتی پر وکٹیں لینے کا بھاری بوجھ ہے۔دوسری جانب، لکھنؤ کی ٹیم حالیہ فتوحات کے بعد بلند حوصلوں کے ساتھ کولکتہ پہنچی ہے۔ٹاپ آرڈر میں مشیل مارش اور ایڈن مارکرم (45 رنز) ٹیم کو جارحانہ آغاز فراہم کر رہے ہیں۔ کپتان رشبھ پنت نے گزشتہ میچ میں 68 رنز کی ناقابلِ شکست اننگز کھیل کر ثابت کر دیا ہے کہ وہ دباؤ میں میچ ختم کرنے کا فن جانتے ہیں۔ نکولس پورن، جن کا کے کے آر کے خلاف ریکارڈ بہترین ہے، کولکتہ کے لیے بڑا خطرہ بن سکتے ہیں۔ محمد شامی اپنی بہترین فارم میں ہیں، انہوں نے گزشتہ میچ میں صرف 9 رنز دے کر 2 وکٹیں حاصل کیں۔ اویش خان اور پرنس یادو ان کا بھرپور ساتھ دے رہے ہیں۔ایڈن گارڈنز کی پچ روایتی طور پر بلے بازوں کے لیے سازگار سمجھی جاتی ہے، لیکن درمیانی اوورز میں اسپنرز کا کردار کلیدی ہوگا۔کے کے آر اپنی ہار کا سلسلہ توڑ کر ہوم گراؤنڈ پر فاتحانہ واپسی چاہے گی ۔ایل ایس جی اپنی فتوحات کے تسلسل کو برقرار رکھتے ہوئے پوائنٹس ٹیبل پر پوزیشن مستحکم کرنا چاہے گی ۔یہ مقابلہ تجربہ کار لکھنؤ اور جدوجہد کرتی کولکتہ کے درمیان ایک اعصاب شکن معرکہ ثابت ہو سکتا ہے، جہاں جیت کا دارومدار دباؤ کے لمحات میں بہتر فیصلے کرنے پر ہوگا۔
