بنگلہ دیش بھارت آکر میچ کھیلے گایا نہیں؟ فیصلہ کل
اگر بنگلہ دیش انکار کرتا ہے تو رینکنگ کی بنیاد پر سکاٹ لینڈ کو موقع مل سکتا ہے
نئی دہلی،19؍جنوری(ایجنسی):آئی سی سی (ICC) نے بنگلہ دیش کرکٹ بورڈ (BCB) کو 21 جنوری تک یہ واضح کرنے کی مہلت دی ہے کہ آیا وہ 2026 کے ٹی-20 ورلڈ کپ میں حصہ لے گا اور کیا اس کی ٹیم میچ کھیلنے کے لیے بھارت آئے گی۔ ای ایس پی این کرک انفو کے مطابق، آئی سی سی نے ہفتہ (17 جنوری) کو ڈھاکہ میں منعقدہ اجلاس کے دوران اس ڈیڈ لائن سے بی سی بی کو آگاہ کر دیا ہے۔ایک ہفتے کے دوران آئی سی سی اور بی سی بی کے درمیان یہ دوسری ملاقات تھی۔ اس میں بی سی بی نے واضح کیا کہ وہ ورلڈ کپ کھیلنا چاہتا ہے، لیکن بھارت سے باہر۔ بی سی بی کا موقف ہے کہ بھارت میں کھیلنے کے حوالے سے ٹیم کی سیکیورٹی پر تشویش ہے۔ بی سی بی نے تجویز دی کہ ان کے میچ ٹورنامنٹ کے شریک میزبان ملک سری لنکا میں کرائے جائیں۔ تاہم، آئی سی سی اپنے فیصلے پر قائم ہے اور واضح کر دیا ہے کہ شیڈول میں کوئی تبدیلی نہیں ہوگی اور بنگلہ دیش کو گروپ سی میں ہی کھیلنا ہوگا۔اگر بنگلہ دیش نے انکار کیا تو آئی سی سی متبادل ٹیم شامل کر سکتی ہے، جس میں رینکنگ کی بنیاد پر اسکاٹ لینڈ کے امکانات سب سے زیادہ ہیں۔ آئی سی سی نے بی سی بی کی گروپ تبدیل کرنے کی مانگ بھی مسترد کر دی ہے اور یقین دہانی کرائی ہے کہ ٹیم کو کوئی خاص سیکیورٹی خطرہ نہیں ہے۔موجودہ شیڈول کے تحت بنگلہ دیش کو ویسٹ انڈیز، اٹلی اور انگلینڈ کے خلاف کولکتہ میں تین میچ کھیلنے ہیں، جبکہ آخری گروپ میچ ممبئی میں نیپال کے خلاف طے ہے۔ بی سی بی نے گروپ بی میں منتقلی کی درخواست کی تھی تاکہ اسے اپنے تمام میچز سری لنکا میں کھیلنے کا موقع ملے، لیکن آئی سی سی نے اسے نہیں مانا۔
بنگلہ دیش میں ہندوؤں کے قتل کے واقعات کے پیش نظر بی سی سی آئی (BCCI) نے مستفیض الرحمان کو آئی پی ایل کھیلنے کی اجازت نہیں دی۔ کے کے آر (KKR) نے انہیں 20.9کروڑ روپے میں خریدا تھا، لیکن 3 جنوری کو انہیں ٹیم سے باہر کر دیا گیا۔ اس فیصلے سے ناراض بنگلہ دیشی حکومت نے ملک میں آئی پی ایل کی نشریات پر پابندی لگا دی اور کھلاڑیوں کی سیکیورٹی کا حوالہ دے کر ورلڈ کپ کے وینیو کی تبدیلی کا مطالبہ کر دیا۔ورلڈ کپ میں بنگلہ دیش کا پہلا میچ 7 فروری کو ویسٹ انڈیز کے خلاف کولکتہ کے ایڈن گارڈنز میں ہونا ہے۔ اس کے بعد 9 فروری کو اٹلی اور 14 فروری کو انگلینڈ سے مقابلہ طے ہے، جبکہ آخری گروپ میچ 17 فروری کو ممبئی میں نیپال کے خلاف کھیلا جانا ہے۔
