جنوبی افریقہ کی خواتین ٹیم نے ویسٹ انڈیز کو 166 رنز سے شکست دی

کیو ہل، 18 جون (یواین آئی) تیجمین برٹس (101) کی شاندار سنچری، کپتان لورا وولفارٹ (75) کی عمدہ اننگز اور ایم کلاس (چار وکٹیں)، این ملابا اور اینری ڈرکسن (دو دو وکٹیں) کی شاندار گیند بازی کی بدولت جنوبی افریقہ کی خواتین ٹیم نے بارش سے متاثرہ تیسرے ایک روزہ میچ میں ویسٹ انڈیز کو (ڈی ایل ایس طریقہ کار) سے 166 رنز سے شکست دے دی اس کے ساتھ ہی جنوبی افریقہ نے تین میچوں کی سیریز 2-1 سے جیت لی۔ تیجمین برٹس کو ان کی شاندار کارکردگی کے لیے “پلیئر آف دی میچ” اور “پلیئر آف دی سیریز” کے ایوارڈ سے نوازا گیا۔ویسٹ انڈیز کی خواتین ٹیم نے منگل کی رات کھیلے گئے میچ میں ٹاس جیت کر جنوبی افریقہ کے خلاف پہلے گیند بازی کا فیصلہ کیا۔ بیٹنگ کے لیے اتری جنوبی افریقہ کے لیے تیجمین برٹس اور کپتان لورا وولفارٹ کی اوپننگ جوڑی نے پہلی وکٹ کے لیے 184 رنز جوڑ کر شاندار آغاز کیا۔ 27ویں اوور میں ایفی فلیچر نے تیجمین برٹس کو آؤٹ کر کے ویسٹ انڈیز کو پہلی کامیابی دلائی۔ تیجمین برٹس نے 91 گیندوں پر 101 رنز کی اننگز کھیلی۔ فلیچر کا اگلا شکار لورا وولفارٹ (75 رنز) بنیں۔ اس کے بعد ویسٹ انڈیز کے گیند بازی کے حملے کے سامنے جنوبی افریقہ کی بلے بازکھل کر نہ کھیل سکیں۔ نونڈومیسو شنگاسے (9)، سونے لس (4)، سینالو جافٹا (11) اور اینری ڈرکسن (12) رنز بنا کر آؤٹ ہوئیں۔ بارش کی وجہ سے کھیل روکے جانے کے وقت جنوبی افریقہ نے 45.5 اوورز میں چھ وکٹوں پر 278 رنز بنا لیے تھے۔ ایم کیپ (34) اور کلوئی ٹرائون (10) رنز بنا کر ناٹ آؤٹ رہیں۔ویسٹ انڈیز کی جانب سے ایفی فلیچر نے تین وکٹیں حاصل کیں۔ جے کلاکسٹن، ہیلی میتھیوز اور عالیہ ایلین نے ایک ایک بلے بازکو آؤٹ کیا۔بارش کے بعد ڈی ایل ایس طریقہ کار کے تحت ملنے والے نئے ہدف کا تعاقب کرنے اتری ویسٹ انڈیز کی خواتین ٹیم جنوبی افریقی گیند بازوں کے سامنے شروع سے ہی جدوجہد کرتی رہی۔ ویسٹ انڈیز نے 29 رنز پر اپنی پانچ وکٹیں گنوا دیں۔ ویسٹ انڈیز کے لیے جے کلاکسٹن نے 32 گیندوں پر 43 رنز بنائے۔ عالیہ ایلین نے 49 گیندوں پر 32 رنز جوڑے۔ شیمین کیمپبیل (12) رنز بنا کر آؤٹ ہوئیں۔ جنوبی افریقہ کی درست گیند بازی کے سامنے ویسٹ انڈیز کی پوری ٹیم 27.5 اوورز میں 121 رنز پر ڈھیر ہو گئی۔ اس کے ساتھ ہی جنوبی افریقہ نے 166 رنز سے میچ اور 2-1 سے سیریز اپنے نام کر لی۔جنوبی افریقہ کی جانب سے ایم کلاس نے چھ اوورز میں 25 رنز دے کر چار وکٹیں حاصل کیں۔ این ملابا نے سات اوورز میں 25 رنز دے کر دو وکٹیں لیں اور اینری ڈرکسن نے پانچ گیندوں میں ایک رن دے کر دو وکٹیں حاصل کیں۔ کیپ نے ایک بلے باز کو آؤٹ کیا۔