آئی پی ایل اورنج کیپ کی دوڑ میں سمیر رضوی سب سے آگے، روی بشنوئی پرپل کیپ کے حقدار

بنگلورو، 6 اپریل (یواین آئی ) انڈین پریمیئر لیگ (آئی پی ایل) 2026 کے سنسنی خیز مقابلوں کا سلسلہ جاری ہے، جہاں تمام ٹیمیں اپنے دو دو میچز مکمل کر چکی ہیں، جبکہ سن رائزرز حیدرآباد اور چنئی سپر کنگز تین تین میچز کھیل چکی ہیں۔ اس وقت بیٹنگ چارٹ پر دہلی کیپٹلز کے نوجوان اسٹار سمیر رضوی اور بولنگ میں روی بشنوئی سرفہرست ہیں۔دہلی کیپٹلز (ڈی سی ) کے نمبر 4 بلے باز سمیر رضوی نے اب تک ٹورنامنٹ میں اپنی دھاک بٹھا دی ہے۔ انہوں نے دو میچوں میں ہدف کا تعاقب کرتے ہوئے نہ صرف اپنی ٹیم کو فتوحات دلائیں بلکہ مجموعی طور پر 160 رنز بنا کر اورنج کیپ اپنے نام کر لی ہے۔انہوں نے لکھنؤ سپر جائنٹسکے خلاف 47 گیندوں پر ناقابل شکست 70 رنز اورممبئی انڈینزکے خلاف 51 گیندوں پر 90 رنز کی شاندار اننگز کھیلی۔ان دونوں ہی میچوں میں وہ ‘پلیئر آف دی میچ‘ قرار پائے۔رنز کی فہرست میں ان کے قریب سن رائزرس حیدرآباد کے ہینرک کلاسن ہیں، جنہوں نے تین اننگز میں 145 رنز بنائے۔ ان کی انفرادی اننگز 31، 52 اور 62 رنز پر مشتمل ہیں۔ اس کے بعد ممبئی انڈینز کے روہت شرما کا نمبر آتا ہے، جنہوں نے دو اننگز میں 113 رنز اسکور کیے، جس میں کولکتہ نائٹ رائیڈرز کے خلاف 38 گیندوں پر 78 رنز کی اننگز شامل ہے۔مزید تین بلے باز بھی 100 رنز کا ہندسہ عبور کر چکے ہیں، رائل چیلنجرز بنگلور کے دیودت پڈیکل (111 رنز)، پنجاب کنگز کے کوپر کونولی (108 رنز) اور کولکتہ نائٹ رائیڈرز کے انگکرش رگھوونشی (103 رنز)۔بولنگ کے شعبے میں کانٹے کا مقابلہ جاری ہے جہاں چار گیند باز 5-5 وکٹیں لے کر برابری پر ہیں، لیکن بہتر اکانومی اور بہترین انفرادی کارکردگی کی بنیاد پر روی بشنوئی کے پاس پرپل کیپ موجود ہے۔بشنوئی نے راجستھان رائلز کے خلاف محض 41 رنز دے کر 4 وکٹیں حاصل کیں، جو اس ٹورنامنٹ کے اب تک کے صرف دو ‘فور وکٹ ہال‘ میں سے ایک ہے۔کے کے آر کے بلیسنگ موزرابانی نے بھی حیدرآباد کے خلاف 4 وکٹیں حاصل کر کے اپنی موجودگی کا احساس دلایا ہے۔دیگر گیند بازوں میں پنجاب کنگز کے وجے کمار ویشاک، رائل چیلنجرز بنگلور کے جیکب ڈفی اور چنئی سپر کنگز کے انشُل کمبوج شامل ہیں، جو 5، 5 وکٹوں کے ساتھ اس دوڑ میں شامل ہیں۔ فی الحال پرپل کیپ روی بشنوئی کے پاس ہے۔یہ تمام گیند باز 5-5 وکٹیں حاصل کر چکے ہیں، جس سے ظاہر ہوتا ہے کہ اس بار پرپل کیپ کی جنگ آخری میچ تک برقرار رہے گی۔