سبالینکا نے کوستیُوک کو شکست دیکر کیریئر کا 22واں خطاب جیت لیا

برسبین،11 جنوری (یو این آئی ) عالمی نمبر ایک کھلاڑی آرینا سبالینکا نے اتوار کو برسبین انٹرنیشنل کے فائنل میں یوکرین کی مارٹا کوستیُوک کو شکست دے کر اپنے کیریئر کا 22واں سنگلز خطاب اور سال 2026 کا پہلا خطاب جیت لیا۔سبالینکا نے ایک گھنٹہ 18 منٹ تک جاری رہنے والے مقابلے میں عالمی نمبر 26 کوستیُوک کو 6-4، 6-3 سے ہرایا اور مسلسل دوسرے سال برسبین انٹرنیشنل کا ٹائٹل اپنے نام کیا۔کوستیُوک کے خلاف اس فتح کے ساتھ سبالینکا نے آسٹریلین اوپن کے وارم اپ ایونٹ میں شاندار کارکردگی کا مظاہرہ کیا، جہاں انہوں نے پانچ میچز میں ایک بھی سیٹ نہیں گنوایا۔اس کامیابی کے بعد سبالینکا ٹورنامنٹ کی 17 سالہ تاریخ میں برسبین انٹرنیشنل کا مسلسل خطاب جیتنے والی تیسری خاتون کھلاڑی بن گئیں۔ 2023 کے آغاز سے آسٹریلیا میں ان کا مجموعی ریکارڈ 38 فتوحات اور صرف دو شکستوں پر مشتمل ہے۔سبالینکا نے فائنل میں دونوں سیٹس کے آغاز میں 3-0 کی برتری حاصل کی۔ اگرچہ کوستیُوک پہلے سیٹ میں واپسی میں کامیاب ہو گئیں، تاہم دوسرے سیٹ میں سبالینکا نے دباؤ برقرار رکھا اور ایک زبردست وائیڈ سرو کے ذریعے پہلا ہی چیمپئن شپ پوائنٹ جیت کر مقابلہ ختم کر دیا۔سبالینکا اب 18 جنوری سے میلبورن میں شروع ہونے والے آسٹریلین اوپن میں چار برسوں میں تیسرا خطاب جیتنے کی کوشش کریں گی۔