مرد اور خواتین دونوں زمروں میں گولڈ میڈل جیت لیے
رائے پور، 2 اپریل (یو این آئی): اوڈیشہ نے کھیلو انڈیا ٹرائبل گیمز 2026 میں مرد اور خواتین دونوں زمروں میں ہاکی کے طلائی تمغے (گولڈ میڈل) جیت کر میدان میں اپنے غلبے کو ثابت کر دیا ہے۔ رائے پور کے ولبھ بھائی پٹیل انٹرنیشنل ہاکی اسٹیڈیم میں کھیلے گئے فائنل مقابلوں میں اوڈیشہ کی مردوں کی ٹیم نے جھارکھنڈ کو 1-4 سے شکست دی، جبکہ خواتین کی ٹیم نے ایک سنسنی خیز مقابلے میں میزورم کو 0-1 سے شکست دے کر کامیابی حاصل کی۔ مردوں کے مقابلے میں جھارکھنڈ نے چاندی (سلور) اور چھتیس گڑھ نے کانسی (برونز) کا تمغہ جیتا، جبکہ خواتین کے زمرے میں جھارکھنڈ نے تیسری پوزیشن حاصل کر کے پوڈیم مکمل کیا۔آج یہاں کھیلے گئے ان مقابلوں میں اوڈیشہ کی مردوں کی ٹیم نے فائنل میں جھارکھنڈ کو 1-4 سے ہرا کر اپنی برتری برقرار رکھی۔ دوسری جانب، خواتین کی ٹیم نے سخت مقابلے کے بعد میزورم کو 0-1 سے شکست دی۔ ان مقابلوں میں جھارکھنڈ اور چھتیس گڑھ کی ٹیموں کی پوڈیم تک رسائی ان خطوں سے ابھرتے ہوئے نئے ٹیلنٹ کی گہرائی کو ظاہر کرتی ہے۔ تاہم، تمغوں سے ہٹ کر اصل کہانی ان گاؤوں اور بستیوں کی ہے جہاں اب ہاکی محض ایک کھیل نہیں بلکہ ترقی کا ایک بڑا ذریعہ بن چکی ہے۔رائے پور میں منعقدہ کھیلو انڈیا ٹرائبل گیمز 2026 میں اوڈیشہ کی یہ دوہری کامیابی اس بات کی بہترین مثال ہے کہ کس طرح ہاکی اوڈیشہ، جھارکھنڈ اور چھتیس گڑھ کے قبائلی علاقوں میں زندگی کو نئی سمت دے رہی ہے۔ شمال مشرقی ریاستوں، جنہیں کھیلوں کی صلاحیتوں کا گڑھ مانا جاتا ہے، نے بھی اپنی بھرپور موجودگی درج کرائی جہاں میزورم کی ٹیم فائنل تک پہنچنے میں کامیاب رہی۔ دہائیوں سے ہاکی قبائلی ثقافت کا حصہ رہی ہے، جہاں بچے درختوں کی ٹہنیوں سے اسٹک بنا کر ننگے پاؤں کھیلتے تھے۔ ٹیلنٹ ہمیشہ موجود تھا، لیکن اب مرکزی وزارت کھیل اور ریاستوں کے ‘سینٹر آف ایکسی لینس‘ کے ذریعے انہیں بہتر بنیادی ڈھانچہ اور منظم تربیت فراہم کی جا رہی ہے۔1992 کے بارسلونا اولمپک میں ہندوستانی ٹیم کا حصہ رہنے والے سابق اولمپین اجیت لکڑا، جو اس وقت بلاسپور سینٹر آف ایکسی لینس کے چیف کوچ ہیں، اس تبدیلی کو قریب سے دیکھ رہے ہیں۔ انہوں نے کہا کہ گراس روٹ سے لے کر جونیئر اور سینئر سطح تک پورا نظام مضبوط ہو رہا ہے، جس سے قبائلی کھلاڑیوں کو اپنی قدرتی صلاحیتوں کو نکھارنے کا موقع مل رہا ہے۔ جو علاقے کبھی سماجی و اقتصادی چیلنجز کا شکار تھے، وہاں اب ہاکی ایک پل کا کردار ادا کرتے ہوئے ان برادریوں کو قومی دھارے سے جوڑ رہی ہے۔اسی طرح 1984 کے لاس اینجلس اولمپک کے کھلاڑی منوہر ٹوپنو نے، جنہوں نے جھارکھنڈ اور چھتیس گڑھ کی ٹیموں کو کوچنگ دی ہے، کھیلو انڈیا ٹرائبل گیمز جیسے اقدامات کی تعریف کی۔ ان کا کہنا تھا کہ ہمارے قبائلی علاقوں میں ہاکی فطری طور پر کھیلی جاتی ہے۔
، اور اگر ہم ان علاقوں پر توجہ دیں تو یہ کھلاڑی ایک دن بین الاقوامی سطح پر ہندوستان کی نمائندگی کر کے ملک کا نام روشن کریں گے۔ حکومت کا ‘اسمیتا‘ پروگرام بھی زیادہ سے زیادہ خواتین کھلاڑیوں کو کھیلوں سے جوڑ رہا ہے، جو ان کی زندگی میں ایک نئی پہچان بن رہا ہے۔
