ملبورن،19؍جنوری(ایجنسی):سربیا کے اسٹار ٹینس کھلاڑی نوواک جوکووچ نے آسٹریلین اوپن میں اپنی 100 ویں جیت درج کر لی۔ انہوں نے اسپین کے پیڈرو مارٹنیز کے خلاف یکطرفہ مقابلے میں 6-3، 6-2، 6-2 سے کامیابی حاصل کی۔ یہ میچ تقریباً دو گھنٹے تک جاری رہا اور سیدھے سیٹوں میں جیت کے بعد جوکووچ مطمئن نظر آئے۔ اس جیت کے ساتھ ہی وہ چار میں سے تین گرینڈ سلیم ٹورنامنٹس میں 100 یا اس سے زیادہ میچ جیتنے والے کھلاڑی بن چکے ہیں۔آسٹریلین اوپن میں دیگر بڑے کھلاڑیوں نے بھی شاندار آغاز کیا۔ امریکہ کی اسٹار کھلاڑی کوکو گاف، ڈینیئل میدویدیف، ورلڈ نمبر-6 ایلکس ڈی مینار اور ورلڈ نمبر-1 کارلوس الکراز نے اپنے اپنے مقابلے جیت کر اگلے راؤنڈ میں جگہ بنا لی۔خواتین کے زمرے میں وینس ولیمز نے تاریخ رقم کرتے ہوئے ویمنز سنگلز کا میچ کھیلنے والی سب سے معمر ترین کھلاڑی بننے کا ریکارڈ بنایا۔ وہیں، 300 سے زائد رینک رکھنے والی کوئنز لینڈ کی اسٹارم ہنٹر نے بڑا الٹ پھیر کرتے ہوئے ورلڈ نمبر-40 کھلاڑی باؤزس مانیئرو کو ہرا دیا۔
گاف نے ازبکستان کی کامیلا راکھیمووا کو ہرا دیا
تیسری سیڈ کوکو گاف نے راڈ لیور ایرینا میں کھیلے گئے پہلے راؤنڈ کے مقابلے میں ازبکستان کی کامیلا راکھیمووا کو سیدھے سیٹوں میں 6-2، 6-3 سے ہرا کر دوسرے راؤنڈ میں جگہ بنا لی۔ میچ کے بعد گاف نے پہلے راؤنڈ کے دباؤ کے حوالے سے کہا، ‘میں پہلے بھی گرینڈ سلیم کے پہلے راؤنڈ میں ہار چکی ہوں، اس لیے اب خود پر زیادہ دباؤ نہیں ڈالتی۔ اس وقت میرا ہدف صرف ٹورنامنٹ جیتنا ہے۔ اگر میں پہلے راؤنڈ میں ہاروں یا فائنل میں، تب بھی میں خود سے مطمئن رہوں گی۔
ڈینیئل میدویدیف نے نیدرلینڈز کے کھلاڑی کو ہرا دیا
ڈینیئل میدویدیف نے بھی پیر کو آسٹریلین اوپن کے مقابلے میں نیدرلینڈز کے جیسپر ڈی جونگ کو 7-5، 6-2، اور 7-6 سے ہرا کر دوسرے راؤنڈ میں رسائی حاصل کر لی ہے۔
ڈی مینار بھی دوسرے راؤنڈ میں پہنچ گئے
ورلڈ نمبر-6 ایلکس ڈی مینار نے شاندار کارکردگی کا مظاہرہ کرتے ہوئے اپنا میچ 6-2، 6-2، 6-3 سے جیت لیا۔ ڈی مینار کو میکڈونلڈ کی غلطیوں کا بھی فائدہ ملا۔ وہیں، آسٹریلوی کھلاڑی کو مقامی تماشائیوں کی بھی بھرپور حمایت حاصل رہی۔ میچ کے بعد سابق ٹینس کھلاڑی ٹوڈ وڈ برج نے ڈی مینار کی جم کر تعریف کی۔ اب دوسرے راؤنڈ میں ڈی مینار کا مقابلہ سربیا کے حماد میجدوچ سے ہوگا۔
آسٹریلین اوپن میں نوواک جوکووچ کی سنچری؛ 100ویں جیت درج کر کے نیا ریکارڈ بنا ڈالا
