آئی پی ایل 2026: جوفرا آرچر کی آل راؤنڈ کارکردگی

راجستھان رائلز نے ممبئی انڈینز کو 30 رن سے شکست دی

پلے آف میں سن رائزرز حیدرآباد سے مقابلہ طے

ممبئی، 24 مئی (یواین آئی )انگلش فاسٹ بولر جوفرا آرچر کی شاندار آل راؤنڈ کارکردگی (32 رنز اور 17 رنز کے عوض 3 وکٹیں) کی بدولت راجستھان رائلز نے آئی پی ایل 2026 کے 69 ویں میچ میں ممبئی انڈینز کو 30 رنز سے شکست دے دی۔ اس فتح کے ساتھ ہی راجستھان رائلز نے سن رائزرز حیدرآباد کے خلاف ‘ایلیمینیٹر ‘ مقابلے کے لیے اپنا ٹکٹ بک کر لیا ہے، جبکہ پنجاب کنگز اور کولکتہ نائٹ رائیڈرز پلے آف کی دوڑ سے باہر ہو گئی ہیں۔
206 رنز کے بڑے ہدف کے تعاقب میں ممبئی انڈینز کا آغاز انتہائی تباہ کن رہا۔ جوفرا آرچر نے پہلے ہی اوور میں روہت شرما کو کھاتہ کھولے بغیر پویلین بھیج دیا اور پھر تیسرے اوور میں نمن دھیر (6) کو کلین بولڈ کر دیا۔ ناندرے برگر اور برجیش شرما نے جلد ہی مزید دو وکٹیں لے کر ممبئی کا اسکور 4 وکٹوں پر 30 رنز کر دیا۔ ممبئی کے کپتان ہاردک پانڈیا نے 15 گیندوں پر 34 رنز (3 چوکے، 2 چھکے) بنا کر جوابی حملہ کیا، لیکن آرچر نے انہیں 16 ویں اوور میں آؤٹ کر کے ممبئی کی امیدوں پر پانی پھیر دیا۔ سوریہ کمار یادو نے 42 گیندوں پر 60 رنز (4 چھکے، 3 چوکے) کی اننگز کھیل کر مزاحمت جاری رکھی، تاہم ناندرے برگر نے انہیں آؤٹ کر کے ممبئی کی شکست یقینی بنا دی۔ ممبئی کی ٹیم مقررہ 20 اوورز میں 9 وکٹوں پر صرف 175 رنز بنا سکی۔راجستھان کی جانب سے جوفرا آرچر نے 3 جبکہ ناندرے برگر، یش پنجا اور برجیش شرما نے 2، 2 وکٹیں حاصل کیں۔
اس سے قبل، ٹاس ہار کر پہلے بیٹنگ کرتے ہوئے راجستھان رائلز نے مقررہ 20 اوورز میں 8 وکٹوں پر 205 رنز بنائے۔یشسوی جیسوال (27) اور ویبھو سوریاونشی (4) کے جلد آؤٹ ہونے کے بعد ٹیم دباؤ میں تھی۔دھرو جریل نے 26 گیندوں پر 38 رنز اور داسن شانکا نے 15 گیندوں پر 29 رنز بنا کر اننگز کو سنبھالا۔جوفرا آرچر نے بلے بازی میں بھی جوہر دکھائے اور صرف 15 گیندوں پر 3 چھکوں کی مدد سے 32 رنز کی قیمتی اننگز کھیلی۔ آخری لمحات میں روندر جڈیجہ (19 ناٹ آؤٹ) نے اسکور کو 200 کے پار پہنچانے میں اہم کردار ادا کیا۔ممبئی کی جانب سے دیپک چاہر اور شاردول ٹھاکر نے 2، 2 وکٹیں حاصل کیں۔
اس نتیجے کے بعد آئی پی ایل 2026 کا میلہ اب اپنے آخری مراحل میں داخل ہو گیا ہے۔ راجستھان رائلز اب سن رائزرز حیدرآباد کے خلاف ایلیمینیٹر میں ٹکرائے گی، جبکہ ممبئی انڈینز کے لیے اس سیزن کا سفر ایک اور شکست کے ساتھ تمام ہوا۔