سوریہ کمار کپتان؛ایشان کشن کی واپسی ، گل باہر
ممبئی،20؍دسمبر(ایجنسی): آئندہ سال ہونے والے ٹی-20 عالمی کپ کے لیے ہندوستانی ٹیم کا اعلان ہو گیا۔ جیسی کہ امید تھی، سوریہ کمار یادو کو ٹیم کا کپتان مقرر کیا گیا ہے۔ ٹیم سلیکشن میں کچھ حیران کرنے والے فیصلے بھی ہوئے ہیں، مثلاً شبھمن گل کو ٹیم میں جگہ نہیں ملی ہے۔ وہ جنوبی افریقہ کے خلاف سیریز میں نائب کپتان تھے، لیکن ان کا فارم بالکل بھی نظر نہیں آ رہا تھا۔ اسی کو پیش نظر رکھتے ہوئے سلیکٹرس نے ان کو آرام دینے کا فیصلہ کیا۔ 15 رکنی ہندوستانی اسکواڈ میں ایشان کشن کی اچانک انٹری بھی حیرت انگیز ہے۔ وہ تقریباً 2 سالوں بعد 15 رکنی ہندوستانی ٹیم کا حصہ بنے ہیں۔ ساتھ ہی رنکو سنگھ کو بھی ہندوستانی اسکواڈ کا حصہ بنایا گیا ہے، جو کہ جنوبی افریقہ کے خلاف ٹی-20 سیریز کا حصہ نہیں بنے تھے۔20 دسمبر کو ممبئی کے بی سی سی آئی ہیڈکوارٹر میں چیف سلیکٹر اجیت اگرکر کی قیادت میں ہندوستانی کرکٹ ٹیم کے سلیکٹرس کی میٹنگ ہوئی تھی۔ اس میٹنگ میں سوریہ کمار یادو بھی شامل ہوئے تھے اور پھر بہت غور و خوض کے بعد 15 کھلاڑیوں کے ناموں پر مہر لگی۔ ہندوستانی اسکواڈ میں بیشتر انہی کھلاڑیوں کو موقع ملا ہے جو جنوبی افریقہ کے خلاف ٹی-20 سیریز میں کھیلتے نظر آئے تھے۔ قابل ذکر بات یہ ہے کہ ٹی-20 عالمی کپ کے لیے جس اسکواڈ کا اعلان کیا گیا ہے، وہی اسکواڈ نیوزی لینڈ کے خلاف جنوری ماہ میں کھیلی جانے والی 5 ٹی-20 میچوں کی سیریز کا بھی حصہ رہیں گے۔ یعنی عالمی کپ سے عین قبل ہندوستانی ٹیم کے لیے پریکٹس کا بہترین موقع ملنے والا ہے۔ہندوستانی اسکواڈ پر نظر ڈالیں تو تیز گیندبازی کی قیادت جسپریت بمراہ کریں گے اور دیگر تیز گیندبازوں میں عرشدیپ سنگھ و ہرشت رانا ٹیم میں شامل کیے گئے ہیں۔ اسپن گیندبازوں میں ورون چکرورتی اور کلدیپ یادو کا انتخاب ہوا ہے۔ ہاردک پانڈیا، اکشر پٹیل اور شیوم دوبے کا سلیکشن بطور آل راؤنڈر ہوا ہے۔ وکٹ کیپر بلے باز جیتیش شرما بھی ٹیم میں جگہ نہیں بنا پائے ہیں، جس سے اندازہ ہوتا ہے کہ ایشان کشن کو 11 رکنی ٹیم میں بھی شامل کیا جا سکتا ہے۔ سلامی بلے بازی کی ذمہ داری ابھشیک شرما کے ساتھ سنجو سیمسن نبھا سکتے ہیں، جو کہ جنوبی افریقہ کے خلاف آخری ٹی-20 میچ میں بہت اچھا کھیلتے دکھائی دیے تھے۔
ٹی-20 عالمی کپ کے لیے ہندوستانی اسکواڈ اس طرح ہے:
سوریہ کمار یادو (کپتان) ابھشیک شرما، سنجو سیمسن (وکٹ کیپر)، ایشان کشن (وکٹ کیپر)، ہاردک پانڈیا، تلک ورما، اکشر پٹیل (نائب کپتان)، شیوم دوبے، رنکو سنگھ، واشنگٹن سندر، کلدیپ یادو، ورون چکرورتی، جسپریت بمراہ، ہرشت رانا، عرشدیپ سنگھ۔
