انڈیا’اے‘ مردوں کی ہاکی ٹیم یورپ دورے کیلئے نیدرلینڈز روانہ

بنگلورو، 5 جولائی (یو این آئی) کپتان سنجے اور نائب کپتان موئرنگتھیم ربیچندر سنگھ کی قیادت میں انڈیا اے مردوں کی ہاکی ٹیم 8 سے 20 جولائی تک یورپ کے دورے کے لیے ہفتہ کی صبح نیدر لینڈز کے لیے روانہ ہوگئی۔انڈیا اے ٹیم یورپ کے تین شہروں میں کل آٹھ میچ کھیلے گی۔ انڈیا ’اے‘ ٹیم آئنڈہوون (نیدر لیڈز) میں آئرلینڈ، فرانس اور نیدر لینڈز کے خلاف دو دو اور ایمسٹیلوین (نیدر لینڈز)، اینٹورپین (بیلجیم) میں انگلینڈ اور بیلجیم کے خلاف ایک ایک میچ کھیلے گی۔یوروپی دورے پر روانہ ہونے سے قبل ہندوستان ’اے‘ کے کپتان سنجے نے کہا ’’یہ دورہ ہمارے لیے اپنی طاقتوں اور کمزوریوں کو جاننے کا ایک اچھا میدان ہوگا۔ ہمارے پاس تجربہ کار کھلاڑیوں اور نوجوان کھلاڑیوں کا اچھا امتزاج ہے۔ یہ دورہ ہمیں اس بات کا اندازہ لگانے کے لیے سخت مقابلہ فراہم کرے گا کہ ہم کہاں کھڑے ہیں۔ اس طرح کی بین الاقوامی کارکردگی ہمیں مستقبل میں اپنی اہم ٹیم کو مضبوط بنانے میں مدد دے گی۔‘‘نائب کپتان موئرنگتھیم نے کہا’’یہ دورہ ٹیم کو اعلیٰ یورپی ٹیموں کے خلاف کھیلنے کی مختلف حرکیات اور شدت کو سمجھنے میں مدد فراہم کرے گا۔ یہ یہاں کے کچھ نوجوان کھلاڑیوں کو ہاکی کا تجربہ بھی فراہم کرے گا جو ہندوستان میں استعمال کیا جاتا ہے۔ ہمیں امید ہے کہ اس کارکردگی سے ہمیں کھلاڑیوں کی اگلی نسل کو بہتر بنانے میں مدد ملے گی۔
‘‘اس دورے کے ساتھ، ہاکی انڈیا کا مقصد ہندوستانی مردوں کی قومی ٹیم کے ٹیلنٹ پول کو مضبوط کرنا اور ہندوستانی ہاکی ستاروں کی اگلی نسل کو بین الاقوامی میچ کا وقت فراہم کرنا ہے۔ ہندوستان اے اور آئرلینڈ کے درمیان پہلا میچ 8 جولائی کو کھیلا جائے گا۔