کھیل اور تعلیم کے ذریعے نوجوانوں کی حوصلہ افزائی وقت کی ضرورت: حفیظ الحسن
جدید بھارت نیوز سروس
مدھو پور،یکم ؍فروری: حفیظ الحسن انصاری وزیر برائے اقلیتی بہبود اور آبی وسائل، حکومت جھارکھنڈ نے مدھوپور اسمبلی حلقہ کے تحت پپرا گاؤں میں حسن کلب کے زیر اہتمام حاجی حسین انصاری میموریل کرکٹ ٹورنامنٹ کے فائنل میچ میں مہمان خصوصی کی حیثیت سے شرکت کی۔ اس تاریخی تقریب کے لیے ہزاروں لوگ جمع ہوئے، جس نے پپرا کو کھیلوں، اتحاد اور جوش کا مرکز بنا دیا۔اس موقع پر وزیر حفیظ الحسن انصاری نے تعلیمی میدان میں نمایاں کارکردگی کا مظاہرہ کرنے والے ہونہار طلباء اور ان کے والدین کو اعزاز سے نوازا۔ انہوں نے سماجی شعبے میں نمایاں خدمات انجام دینے والی شخصیات کو بھی اعزاز سے نوازا۔ وزیر نے کہا کہ تعلیم سماجی تبدیلی کا سب سے طاقتور ذریعہ ہے اور ان کے والد مرحوم حاجی حسین انصاری نے اپنی زندگی تعلیم کے فروغ کے لیے وقف کردی۔انہوں نے کہا کہ کھیل صرف مقابلہ بازی کا نام نہیں ہے بلکہ نظم و ضبط، بھائی چارے اور خود اعتمادی کی علامت ہے۔ کھلاڑیوں نے ٹورنامنٹ میں شاندار کھیل کا مظاہرہ کیا جو نوجوانوں کے لیے مشعل راہ ہے۔ وزیر نے وزیر اعلیٰ ہیمنت سورین کی قیادت میں کھیلوں، تعلیم اور نوجوانوں کو فروغ دینے کے لیے ریاستی حکومت کے عزم کا اعادہ کیا۔ فائنل میچ کے بعد وزیر حفیظ الحسن انصاری نے فاتح اور رنر اپ ٹیموں کو ٹرافیاں پیش کیں۔ منتظمین نے مستقبل میں ٹورنامنٹ کو مزید بڑے اور وسیع پیمانے پر منعقد کرنے کے منصوبوں کا اعلان کیا۔
