ڈیزرٹ وائپرز کی تاریخی کامیابی، پہلی بار آئی ایل ٹی 20 چیمپئن

دبئی،5 جنوری(یو این آئی ) ڈیزرٹ وائپرز نے دبئی انٹرنیشنل اسٹیڈیم میں کھیلے گئے فائنل میں ایم آئی ایمریٹس کو 46 رنز سے شکست دے کر اپنی تاریخ کا پہلا ڈی پی ورلڈ آئی ایل ٹی 20 ٹائٹل اپنے نام کر لیا۔ اس فیصلہ کن معرکے میں کپتان سیم کرن کی آل راؤنڈر کارکردگی اور نسیم شاہ کی تباہ کن بالنگ نے وائپرز کی فتح میں کلیدی کردار ادا کیا۔فائنل میں وائپرز کے کپتان سیم کرن نے شاندار قیادت کا مظاہرہ کرتے ہوئے ناقابلِ شکست 74 رنز کی اننگز کھیلی۔ انہوں نے 51 گیندوں پر آٹھ چوکے اور دو چھکے لگائے اور ٹیم کو 20 اوورز میں 4 وکٹوں کے نقصان پر 182 رنز کے مضبوط اسکور تک پہنچایا۔ میکس ہولڈن نے 32 گیندوں پر 41 رنز کی عمدہ اننگز کھیلی جبکہ ڈین لارنس نے 15 گیندوں پر تیز رفتار 23 رنز بنا کر اختتامی اوورز میں اسکور کو مزید تقویت دی۔ہدف کے تعاقب میں ایم آئی ایمریٹس کی بیٹنگ ابتدا ہی سے دباؤ کا شکار رہی۔ نسیم شاہ نے شاندار بولنگ کرتے ہوئے 18 رنز کے عوض 3 وکٹیں حاصل کیں، جبکہ عثمان طارق (2/20) اور خضیمہ تنویر (2/22) نے بھی مؤثر کردار ادا کیا۔ ڈیوڈ پین نے 18ویں اوور میں تین کھلاڑیوں کو آؤٹ کر کے ایم آئی ایمریٹس کی امیدوں پر پانی پھیر دیا۔ پوری ٹیم 18.3 اوورز میں 136 رنز پر ڈھیر ہو گئی۔ایم آئی ایمریٹس کی جانب سے شکیب الحسن نے 36 اور کیرون پولارڈ نے 28 رنز بنائے، تاہم ابتدائی وکٹیں جلد گرنے کے باعث ٹیم بڑا ہدف حاصل کرنے میں ناکام رہی۔میچ سے قبل شاندار آتش بازی اور ڈرون شو نے دبئی کی فضاؤں کو روشن کر دیا، جس سے فائنل کا ماحول مزید یادگار بن گیا۔اس کامیابی کے ساتھ ڈیزرٹ وائپرز نے 7 لاکھ ڈالر انعامی رقم اور بلیک بیلٹ حاصل کی، جبکہ رنر اپ ایم آئی ایمریٹس کو 3 لاکھ ڈالر دیے گئے۔ سیم کرن نے شاندار آل راؤنڈ کارکردگی کی بدولت ریڈ بیلٹ (بہترین کھلاڑی) اور گرین بیلٹ (بہترین بلے باز) بھی اپنے نام کی۔ انہوں نے ٹورنامنٹ میں 397 رنز اسکور کیے، سات وکٹیں حاصل کیں اور 10 کیچز بھی پکڑے۔ بہترین بالر (وائٹ بیلٹ) وقار سلام خیل (18 وکٹیں)۔بہترین یو اے ای پلیئر (بلیو بیلٹ) محمد وسیم (مسلسل چوتھی بار)۔میچ کے بعد گفتگو کرتے ہوئے سیم کرن نے کہا کہ فائنل سے قبل وہ خاصے نروس تھے، تاہم ٹیم کی مستقل مزاجی اور گہرائی نے فرق ڈال دیا۔ دوسری جانب ایم آئی ایمریٹس کے کپتان کیرون پولارڈ نے اعتراف کیا کہ فیلڈنگ میں غلطیوں اور ابتدائی وکٹوں کے نقصان نے میچ کو مشکل بنا دیا۔