تیونس، 17 نومبر (یو این آئی) تیونس کے صدر قیس سعید نے ہفتہ کے روز سعودی عرب کے وزیر سرمایہ کاری خالد الفالح سے ملاقات کی۔یہ اطلاع صدر کے دفتر سے جاری بیان میں دی گئی ہے۔ ملاقات کے دوران صدر جمہوریہ نے تیونس اور سعودی عرب کے درمیان تعلقات کی مضبوطی اور گہرے ثقافتی تعلقات کی ستائش کی۔مسٹر قیس سعید کے مطابق، تیونس سرمایہ کاری کے عمل کو آسان بنانے اور تیونسی اور غیر ملکی سرمایہ کاروں کے لیے راہ ہموار کرنے کے واسطے نئے قوانین کے نفاذ پر کام کر رہا ہے۔ انہوں نے زور دے کر کہا کہ تیونس سرمایہ کاروں کو صحت مند اور سازگار ماحول میں پروجیکٹ شروع کرنے کی ترغیب دیتا ہے جن سے ان کے اور تیونس کے حقوق کا تحفظ یقینی ہوسکے۔مسٹر خالد الفالح نے ملاقات کے بعد منعقدہ پریس کانفرنس میں کہا، “تیونس نے قابل تجدید توانائی، ہائیڈروجن، لاجسٹک سرمایہ کاری، رئیل اسٹیٹ کی ترقی اور سیاحت سمیت متعدد شعبوں میں سرمایہ کاری کو آمادہ کرنے کے لیے عالمی مسابقت کو کوالیفائی کیا ہے۔” انہوں نے زور دیا کہ سعودی سرمایہ کار مناسب وقت پر ان شعبوں میں داخل ہونے کے لیے تیار ہیں۔سعودی وزیر نے کہا کہ ہم تیونس میں سیاسی اور اقتصادی استحکام اور ترقی کے بارے میں پر امید ہیں۔
