International

روس: اسرائیلی پرواز کی آمد پر داغستان میں ہجوم کا ایئرپورٹ پر دھاوا، 60 گرفتار

162views

روس کے علاقے داغستان میں اسرائیل کے خلاف احتجاج کرنے والے سینکڑوں افراد نے اتوار کو مرکزی ایئرپورٹ پر اس وقت دھاوا بول دیا جب تل ابیب سے ایک پرواز وہاں پہنچی۔

خبر رساں اداروں اے ایف پی اور اے پی کے مطابق داغستان کی وزارت داخلہ نے کہا ہے کہ ہجوم میں شامل 150 سے زیادہ افراد کی شناخت کر لی گئی ہے اور ان میں سے 60 کو گرفتار کر لیا گیا ہے۔

ایئرپورٹ پر موجود افراد یہود مخالف نعرے (اینٹی سیمیٹک) لگا رہے تھے اور مسافروں کو تلاش کر رہے تھے۔

روسی میڈیا نے رپورٹ کیا ہے کہ ہجوم نے روسی کمپنی ریڈ ونگ کے طیارے کو گھیر لیا تھا۔ فلائٹ ریڈار کی ویب سائٹ پر دی گئی معلومات کے مطابق اسرائیل کے دارالحکومت تل ابیب سے پہنچنے والی ریڈ ونگز کی پرواز نے شام سات بجے ماخچکالا پہنچنا تھا۔

آزاد روسی میڈیا آؤٹ لیٹ سوتا نے کہا ہے کہ یہ ٹرانزٹ فلائٹ تھی جسے دو گھنٹے بعد ماسکو کے لیے روانہ ہونا تھا۔

حکام کو مسلم اکثریتی داغستان کے دارالحکومت ماخچکالا کے ایئرپورٹ کو بند کرنا پڑا اور پولیس کو بھی طلب کر لیا گیا تھا۔

داغستان کی وزارت صحت نے کہا ہے کہ 20 سے زیادہ افراد زخمی ہو گئے ہیں جن میں دو کی حالت تشویشناک ہے۔

وزارت صحت نے مزید کہا ہے کہ زخمیوں میں پولیس اہلکار اور عام شہری بھی شامل ہیں۔

روس کی سول ایوی ایشن ایجنسی روساویاتسیا نے ایک بیان میں کہا ہے کہ ایئرپورٹ کو کلیئر کر دیا گیا ہے تاہم چھ نومبر تک آنے والی پروازوں کے لیے بند رہے گا۔

سوشل میڈیا پر شیئر کی گئی ویڈیوز میں دیکھا جا سکتا ہے کہ ہجوم فلسطینی جھنڈے لہرا رہے تھے اور کچھ پولیس کی گاڑیوں کو الٹانے کی کوشش کر رہے تھے۔

ویڈیوز میں یہود مخالف نعرے بھی سنے جا سکتے ہیں جبکہ ہجوم میں موجود کچھ لوگ مسافروں کے پاسپورٹس بھی چیک کر رہے تھے۔

مظاہرہ کرنے والے ایک شخص کے ہاتھ میں موجود پوسٹر پر لکھا ہوا تھا کہ ’داغستان میں بچوں کے قاتلوں کے لیے کوئی جگہ نہیں ہے۔‘

دیگر ویڈیوز میں بھی دیکھا جا سکتا ہے کہ عملے کی جانب سے روکنے پر ایئرپورٹ کے ٹرمینل پر موجود لوگ دروازے توڑنے کی کوشش کر رہے ہیں۔

سات اکتوبر کو حماس کے عسکریت پسندوں کے حملے کے جواب میں اسرائیل نے غزہ کا محاصرہ جاری رکھا ہوا ہے۔ حماس کے حملے میں 14 سو اسرائیلی شہری ہلاک ہوئے تھے جبکہ 230 کو اغوا کیا گیا۔

غزہ میں امدادی اداروں اور وزارت صحت کے اعداد و شمار کے مطابق اسرائیل کی مسلسل بمباری سے آٹھ ہزار سے زیادہ افراد ہلاک ہو چکے ہیں۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.